کار وه دهسهیل ئێمریکایی ئیوشن مهسئولیهت ئهتۆمی جمهوری ئێسلامی ههر رۆژ قۆرس ترهو بود :
کاخ چهرمگ وهتیاس : رژیم جمهوری ئێسلامی ئێران ئهراێ حهل مشکلهیل ئهتۆمی خۆێ له ههر جوره دهمهتهقهێ چهن ترهفه وهگهردێ ولاتهیل رۆژئاوا ، بایه قهبوول بکهێ قهێر فرهترێک له ئهورانیوم غهنی بی خۆێ ئهراێ ئهو دهیشت له ئێران کێل بکهێ . ...ئێعتراز وه کاندید بی ین جمهوری ئێسلامی ئێران ئهراێ ئهندامیهت له نهاد ژنهیل سازمان ملهتهیل یهکگر :
ناسانن جمهوری ئێسلامی ئێران وه ئۆنوان کاندید ئهندامیهت له نهاد مۆدافهێ حۆقوق ژنهیل سازمان ملهتهیل یهکگر ئێعترازهیلێک وه دیواێ خۆیهو داشتیه . ...ماملهیل نهفتی ئێران وهگهردێ چین و ژاپۆن کهمهو بی یه :
کار وهدهسهیل رژیم جمهوری ئێسلامی کهم بی ین ماملهیل نهفتی وهگهردێ 2 ولات چین و ژاپۆن تهئیید کردنه . رۆژ جۆمئه 7 ئابانمانگ ، محهمهد عهلی خهتیبی نمایهندهێ ئێران له سازمان ولاتهیل بفروش نهفت (ئۆپک ) له ناو دهمهتهقهێک وهگهردێ خهوهررهسنی فارس ، وهگهردێ تهئیید ئاشکراێ ئێرتبات نهفتی ئێران وهگهردێ چین و ژاپۆن وهت : کهم بی ین ئێنازهێ ماملهیل نهفتی وه ناو ئێران و ولاتهیل چین و ژاپۆن مهقتهعی و کۆل وهخته ....خامنهیی ئیوشێ : شمارێک وه خاتر نا زانایی ئێدئا کردن وه ناو ههلوژاننهیل رهئیس جمهوری پارهکه تهقهلب کریاس :
خامنهیی وه ناو قسیهیل خۆێ له شار قۆم وهت : برێک له کهسهیلێک که ئێگه له رهێ ئێنقلاب ئێسلامی جیاوه بینه وه هانه خزمهت زد ئێنقلاب ، یهێ وهخت کهسهیل ئێنقلابیێک بین وهلی ئێگه وه دهلیلهیلێک گرفتار حال و رۆژ ئێگه بینه . ...نمایهندهێ مهجلس رژیم جمهوری ئێسلامی وهت : بنزینێک که له ناو ئێران تهولید بود بائس سهرهتان گرتن کهسهیلێک بود که له ئهوه ئێستفاده کهن :
عهسگهر جهلالیان ، ئهندام کۆمیسیون ئێنرژی مهجلس ئێران ، بنزین تهولید بی له پالایشگایل ناو ئێران سهرهتان درس کهر زانس وه خوازیار نوا گرتن تهولید ئهوه بی .
رژیم جمهوری ئێسلامی یهکێک وه فاسدترین دهولهتهیل جهان :
سازمان ناوملهتهیل شفافیهت له بارهێ فهساد ئێقتسادی له دنیا ، رژیم جمهوری ئێسلامی له رهدیف فاسد ترین دهولهتهیل دنیا جی دا . سازمان ناوبریاێ له ناو پانزههمین راپۆرت سالانهێ خۆێ له بارهێ فهساد ئێقتسادی له دنیا ، رژیم ئێسلامی ئێران له ناو 178 ولات دنیا له رهدیف 146 جی دا . وه ناو ئهو رهده بهنییه رژیم ئێسلامی ئێران هاو رهدیف دهولهتهیلێک جور هائیتی ، لیبی و کامرونه وه حال و رۆژێک خراوتر له پاکستان دێرێ .
کار کردن وه بان تهرحێک وه ناو پروژیهیل له زندان مهرکهزی شار سنه :
وه ناو خهوهرهیلێک که له شار سنه ولاوهو بینه هاتیاس : دهسگا قهزایی رژیم له نهزهر دێرێ تهرح ناسیاێ وه پروژیهیل له زندان مهرکهزی ئهو شاره وه ئێجرا بنهێ . وه بان ئهو تهرحه گشت زندانیهیل بێجله زندانیهیل سیاسی وه کهسهیلێک که وه جۆرم کۆشتن کهس یا کهسهیل تر له زندان وه سهر بهن ، تیوهنن وه داین پیول وه کار وهدهسهیل رژیم ، وهخت مهحکومیهت خۆیان بسێنن وه له زندان ئازاد بون . قابل باسه ئهو تهرحه له چهنێک لێیهوهرهو وهلاێ کار وهدهسهیل رژیمه و وه ئهوهیش فرهتر دهسگا قهزایی وه قسه و باس نریاس . رژیم جمهوری ئێسلامی تهسمیم دێرێ وهگهردێ وه ئێجرا نان ئهو تهرحه له یهێ لاوه له فشار ئێنتقادهیل و ئێعترازهیل ناوهکی و دهرهکی له ئێرتبات وهگهردێ حال و رۆژ خراو زندانهیل وه ئهو بان چیین رهقهم زندانیهیل که وه بان ئامارهیل رهسمی ، شمار ئهوان 204 هزار کهسن ، کهمهو بکهێ وه له لاێ ترهو وه گرتن پیول ، سهرچاوهێ دهرامهد ترێک ئهراێ دهسگا قهزایی وه کاروهدهسهیل خۆێ پیا بکهێ . خافل له یهکه بێ گۆمان ئێ تهرحه بائس تهشویق خلافکارهیل بود ، وه ئامار دزی و قاچاخ و جنایهت و خلافهیل تر له یهکه ههس ئهو بان تر چود ، ئهراێ یه که خلافکارهیل زانن وه داین پیول تیوهنن له زندان دهر بچن وه هیچ نگرانیێک له ئهو باره نهێرن .
تهسادف رانندهگی له جادهێ سنه _ دیواندهره قۆروانی گرت :
وه ناو راپۆرتێک که وه ئهو باره ولاوهو بیود هاتیود : ئێوارهێ رۆژ پهنجشهمه 6 ئابانمانگ ئێتفاق رانهندهگی له جادهێ سنه _ دیواندهره 3 کۆشیاێ و 4 زهخمی وه جی هیشت . ئهو ئێتفاقه وه خاتر له یهک دان دۆ دهسگا سهواری پێکان وه پژو له 25 کیلومتری شاره دیواندهره ریو دا . جادهیل ولات ئێران وهگشتێ وه ئهوهیش فرهتر کوردستان وه خاتر خاس کار نهکردن دهسگایل و کار وهدهسهیل رژیم ئێسلامی یهکێک له مهرگوارترین جادهیل دنیا وه حساو چود وه له ناو سال دهههیل هزار قۆروانی گرێ .
کێل کریان یهێ زندانی سیاسی ئهراێ زندان سهقز :
یهێ زندانی سیاسی وه ناو دلێر روزگرد که وه ئێتهام هاوکاری وهگهردێ حێزبهیل کوردی ئۆپوزسیون رژیم جمهوری ئێسلامی وه شار سهقز وهلای نیروهیل ئهمنیهتی ئهو رژیمهو دهسگیر بیود ئهراێ زندان مهرکهزی ئهو شاره کێل کریا . ئهو زندانی سیاسی یه وهرجله یه قهێرێک له زندانێک له شار سنه ئهو پشت سهر نایود . داین ئێتهامهیل سیاسی وه هاوکاری کردن وهگهردێ حێزبهیل کوردی ئۆپوزسیون رژیم وه چالاکهیل سیاسی و کۆمهلایهتی و ئهدهبی و فهرههنگی له کوردستان له لاێ کاروهدهسهیل رژیمهو چشێک تازه نی یه ، ههفته نی یه که چهن چالاک کورد که تهنیا ئهراێ رهسین مهردم کوردستان وه دموکراسی وه فهزاێک ئازادتر ههول دهن ئهراێ زندانهیل ئهو رژیمه کێل نهکریهن .
کۆشیان یهێ ژن جهوان له شار سهردهشت :
ئهراێ جار تر ژن جهوانێک وه ناو سروه بی وه قۆروانی فهرههنگ کوینه پهرهسانه و پیاگ سالارانه و مهزهوی وه وه دهس باوک خۆێ له شار سهردهشت کۆشیا . ئهو ژن 17 ساله وه خاتر نیشان دان ئهلاقهێ خۆێ وه کۆرێک که دوس ئهیو داشتیود وه دهس باوک خۆێ کۆشیایود وه دیواتر تهرمهکهێ ئهیو وه ناو سهد مههاباد پیا بیود . تهفهکۆرهیل کوینهو فهرههنگهیل دیواکهفتیاێ وه داخهوه فره جار بائس کۆشیان دیوهت و ژنهیل کورد له کوردستان بود .
دریژهێ فشارهیل وه بان کاسبکارهیل شار مههاباد :
وه ناو راپۆرتێک که له ئێ باره ولاوهو بیود ، هاتیود : وه ناو ههفتهێ لێیهوهر دهسگا قهزایی رژیم وه شار مههاباد شمارێک وه کاسبکارهیل ئهو شاره ئهراێ ئێدارهیل ئێتلائات بردیاس وه ئهوان وه ژێر فشار و پرس و جورهو خسیاس . دیواێ ئهوپا بی ین ئێعتساب ئۆمومی مهردم شار و ئابادیهیل جوراوجور کوردستان وه ناو رۆژ 23 ئۆردیبهشت مانگ ئێمسال له ئێعتراز وه له دار دان فهرزاد کهمانگهر وه 4 زندانی سیاسی تر له زندان ئێوین که 3 تر وه ئهوانیش کورد بین ، فرهێک له کاسبکارهیل شارهیل کوردستان جور مههاباد وهلاێ دهسگایل قهزایی و ئێتلائاتی رژیمهو ئێحزار وه وه ژێر فشارهیل جوراوجورێکهو خریانه .
ئێعتساب له دانشکهدهێ ئهرواوی دانشگا رازی :
وه ناو رۆژهیل لێیهوهر دانشجوهیل دانشکهدهێ ئهرواوی دانشگا رازی کرماشان له ئێعتراز وه مشکلهیل سێنفی خۆیان ئێعتساب کردیون . دانشجوهیل دانشکهدهێ ناوبریاێ له ئێعتراز وه رهسیدهگی نهکردن کار وهدهسهیل رژیم جمهوری ئێسلامی وه حال و رۆژ زنهی ئهوان وه فرهتر حال و رۆژ خراو غهزایی ، دهس وه ئێعتساب غهزا دایون .
کۆشیان یهێ ژن جهوان له شار سهردهشت :
ئهراێ جار تر ژن جهوانێک وه ناو سروه بی وه قۆروانی فهرههنگ کوینه پهرهسانه و پیاگ سالارانه و مهزهوی وه وه دهس باوک خۆێ له شار سهردهشت کۆشیا . ئهو ژن 17 ساله وه خاتر نیشان دان ئهلاقهێ خۆێ وه کۆرێک که دوس ئهیو داشتیود وه دهس باوک خۆێ کۆشیایود وه دیواتر تهرمهکهێ ئهیو وه ناو سهد مههاباد پیا بیود . تهفهکۆرهیل کوینهو فهرههنگهیل دیواکهفتیاێ وه داخهوه فره جار بائس کۆشیان دیوهت و ژنهیل کورد له کوردستان بود .
دهر کریان کارگهرهیل شرکهت ئاراد غهرب :
کۆمیتهێ هاوئاههنگی ئهراێ کۆمهک وه دامهزریان تهشهکۆلهیل کارگهری وه ئێ باره وه ناو راپۆرتێک هاوردیود : 270 کارگهر شرکهت ئاراد غهرب که له جادهێ کرماشان _ ههمهدان قهرار دێرن له کار دهر کریانه . وه دریژهێ ئهو راپۆرته هاتیود : شمارێک وه کارگهرهیل له کار دهر کریاێ دیواێ ئهوه که وه دهر کریان خۆیان ئێعتراز کردن وهلاێ نیروهیل ئێنتزامی رژیمهو دهسگیر وه ئهراێ پاسگا کل کریان . ئهو کارگهرهیله که له داشتن ئهیدی ، پاداش و مهزایا و ئێمتازهیل سالانه مهحروم بیون ، 2 مانگ دهسمزد ئهودیوا کهفتیاێ خۆیان تا ئێگه نێرتنه . ئاراد غهرب یهێ شرکهت درس کهر قۆفل و سۆئیچ ماشین وه له مالکیهت کهسێک ئێنگلیسی یه که مۆدیریهت ئهوه کهسێک ئێرانی وه مل دێرێ .
حهملهێ مزدورهیل دلنگ شهخسی له وهر رژیم وه مهردم شار کرماشان :
ئێوارهێ رۆژ یهێشهمهێ ههفتهێ لێیهوهر 2 ئابانمانگ وه چوار رهێ ئۆجاق شار کرماشان ، شمارێک له مزدورهیل دلنگ شهخسی له وهر رژیم جمهوری ئێسلامی وهگهردێ حهمله وه ژنهیل و دیوهتهیل ، زرهرو و زیانهیل فرێک وه ماشینهیل حازر وه ئهو مهحهله رهسانن . خهوهرهیل رهسیاێ وه شار کرماشان نیشان له یه دێرن کهسهیل ناوبریاێ وه ناو خیاوان و چوار رهێ ناوبریاێ و مهغازهیل ئهو مهحهله له ژێر ناو مۆبارزه وهگهردێ گهن حجاوی ، وه ژنهیل و دیوهتهیل کرماشانی حهمله کردنه و ئهوان ئهو وهر مشت و لهقه دانه وه دهورملهیل دهور سهر ئهوان درینه . له دریژهێ ئهو خهوهرهیله هاتیود : شمارێک تر له مزدورهیل رژیم وهگهردێ ئهسلهحهیل سهرد وه ماشینهیل مهردم که له سهر چوار ریهیل شار پارک بیون حهمله کردیون وه دهس وه شکانن شیشه و دهر و پهنجرهێ ئهوانه دایون . قابل باسه ئهو کارهیل سهرکۆتگرانهێ کهسهیل دلنگ شهخسی له وهر رژیمه وهگهردێ هاوکاری و حۆزور داشتن نیروهیل ئێنتزامی رژیم وه جی یهیل ناوبریاێ ئهنجام بی یه . ئێ سهرکۆت و تههدیدهیله وه شار کرماشان وه وهختێکه که ئیمه وه ناو ههفتهیل لێیهوهر خهوهرهیل تر وه ئێ باره له شارهیل تر کورد نشین ولاوهو کردیم . کارهیلێک که رژیم وه خاتر نائارامی وه رخ بردن مهردم کورد ئهنجام دهێ . کار وهدهسهیل رژیم توان وه دهس دان وه ئێ کارهیله ههم فهزاێ ترس و وهحشهت وه ناو مهردم درس بکهن وه ههم مهردم سهرکۆت بکهن وه نیشان بهن که ئهوان له گشت جی حۆزور دێرن وه کهس نیهتیوهنێ بێ ئێجازهێ ئهوان نهفهس بکیشێ .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .