جی خالی رشد ئێقتسادی وه راپۆرت بانک مهرکهزی ئێرانهو دیاره :
بانک مهرکهزی ئێران ، راپۆرت ئێقتسادی پارهکهێ خۆێ وه وهختێک وهلاوهو کردیاس که ئهراێ دێمین سال بهردهوام ، جی میزان رشت ئێقتسادی وه ناو ئامارهیل رهسمی خالی یه . ئاخرین ئامارێک که له رشت ئێقتسادی ئێران وهلاوهو بی یه ، مهربوت وه فهسل سهردهواێ سال 1387 ه که 2 و 4 له سهد بی .دریژهێ دهسگیری ئهندامهیل کۆمێتهێ هاوئاههنگی و چالاکهیل کارگهری وه شار نهقهده :
کۆمێتهێ هاوئاههنگی وه ئێ رابتهیشه وه ناو راپۆرتێک تر هاوردیود : چالاک کارگهری وه ئهندام ئهو کۆمێته ، عۆمهر ئێسمائیل پور دیواێ چیین ئهراێ حێفازهت سپا پاسدارهیل شار نهقهده دهسگیر بی یه . ئهو چالاک کارگهری یه که رۆژ پهنجشهمه 20 ئابانمانگ دهسگیر بیود ، تا ئێگه خهوهرێک له حال و رۆژ و جی دهسگیری و ئێتهامهیل وه ئهیو دریاێ ئهو دهیشت نهێریاس . ئهراێ زندان کل کردن عۆمهر ئێسمائیل پور وه وهختێک ئهنجام گرێ که 2 کهس تر له ئهندامهیل ئهو کۆمێته وه ناوهیل سدیق خۆسرهوی وه ئێبراهیم ئێسمائیل پوریش دیواێ دهسگیری له ناو رۆژ دۆشهمه 17 ئابانمانگ ، رۆژ پهنجشهمه 20 ئابانمانگ ئهراێ زندان مهرکهزی شار نهقهده کل کریانه .
دهس له کار کیشان کارگهرهیل و ئۆستادکارهیل شرکهت ساختمانی بهناپی مههاباد :
وه بان راپۆرت کۆمێتهێ هاوئاههنگی هاتیود : فرهتر له 20 کهس له کارگهرهیل شرکهت ساختمانی بهناپی مههاباد ، له ئێعتراز وه نهێریان دهسمۆزدهیل ئهودیواکهفتیاێ وه بیمهێ خۆیان ، دهس له کار کیشانه . کارگهرهیل مۆعتهرز ئێعلام کردیون تا وهختێک که دهسمۆزدهیل ئهودیوا کهفتیاێ وه بیمهێ تهعمین کۆمهلایهتی ئهوان وهلاێ کارفهرماێ شرکهتهو نهێریهێ ، ئهو دیوا وه سهر کار نیهچن . قابل باسه کارگهرهیل شاغل وه ئهو شرکهته 3 مانگه دهسمۆزدهیل ئهو دیوا کهفتیاێ خۆیان نهگرتنه . راپۆرت کۆمێتهێ هاوئاههنگی ئهراێ کۆمهک وه درس بی ین تهشهکۆلهیل کارگهری نیشان له یه دێرێ ، شرکهت ساختمانی ناوبریاێ وهگهردێ فرهتر له 50 کهس ئۆستاد کار و کارگهر ، ئهوه چهن ساله که وه شار مههاباد ، دێرێ مهدرسه سازێ وه کارهیل ساختمانی کهێ .
دریژهێ نادیار بی ین چارهنویس زندانی سیاسی رزا شهریفی بوکانی :
وه ئهو پشت سهر نریان فرهتر له 6 مانگ دهسگیری رزا شهریفی بوکانی ، دادگا ئێسلامی رژیم ، پهروهندهێ ئهو زندانی سیاسی یه ئهراێ شۆعبهێک نادیار کل کردیاس وه ئهیو له له نادیار بی ین کامل چارهنویس خۆێ وه سهر بهێ . زندانی سیاسی رزا شهریفی بوکانی ئێگه له بهند 4 زندان رهجایی شار کهرهج زندانی یه . ناوبریاێ وه ئێتهام هاوکاری وهگهردێ یهکێک له حێزبهیل مۆخالف رژیم له ناو ئۆردیبهشت مانگ ئێمسال وهلاێ مامورهیل وزارهت ئێتلائات رژیمهو دهسگیر کریا .دریژهێ دهسگیریهیل سیاسی له خوهرههلات کوردستان :
له شار سهقز خهوهر رهسی یه وه خاتر تن کردن فشارهیل ئهمنیهتی وه ئهو شاره وه ناو رۆژهیل لێیهوهر ، کار وهدهسهیل دهسگایل ئهمنیهتی رژیم چهن کهس له مهردم ئهو شاره دهسگیر کردنه . وه ئهو ناوه مامورهیل دهسگا ئهمنیهتی رژیم وه شار سهقز چالاک دانشجویی رزگار مۆرادی ، سهعید فهتاحی وه کاسبکارهیل ئهو شاره وه یهکێک له هۆنهرمهندهیل ئهو شاره وه ناو عهلی مۆحهمهدیان دهسگیر کردنه . دهسگایل ئهمنیهتی و قهزایی رژیم تا ئێگه له وهتن ئێتهامهیلێک که وه ئهو کهسهیله دانه خۆیان پیهرزاننه .
مهردم مۆعتهرز وه ئابادی بێژوی سهر وه شار سهردهشتیش وهگهردێ مامورهیل ئێنتزامی رژیم ئێسلامی دهرگیر بیون :
خهوهر رهسیاێ وه شار سهردهشت له ریو دان دهرگیری تفهنگ وهدهسانهێ ساکنهیل ئابادی بێژوی سهر وه ئهو شاره وهگهرد مامورهیل ئهمنیهتی و ئێنتزامی رژیم وه گرتن کامل ئهو ئابادی یه وهلاێ نیروهیل نێزامی رژیمهو نیشان دێرێ . ئێوارهێ رۆژ جۆمعه 21 ئابانمانگ مامورهیل ئهمنیهتی و ئێنتزامی وهگهردێ ئێستفاده کردن له 7 دهسگا ماشین و شمارێک له جاشهیل مهحهلی خۆێ وه خاتر زهبت و قیورت و بڕوا کردن ئهموال و ئهسپاو ئهساسیهێ مهردم زامهت کیش و کاسبکارهیل مهرزی ساکن ئابادی بێژوی وه ناو ئهو ئابادییه رشیان . وه ناو ئهو حهمله ، مامورهیل رژیم قهێر فرێک وه ئهسپا و ئهساسیهێ مهردم ئهو ئابادی یه که فرێک وه ئهوان کاسبکار مهرزی بین زهبت کردن وهلی وهگهردێ وسان مهردم وه نواێ خۆیان ریووهریو بین . خهوهر رهسیاێ وه ئهو ئابادی یه دریژه دهێ 3 دهسگا له ماشینهیل رژیم وهخت ئهو دهیشت چیین له ئهو ئابادی یه وهگهردێ بزمارهیل و میخهیل ولاو بی له ناو جاده پهنچهر و زهیو گیر بین . ماشینهیل تر ههم که تواسن ئهراێ ناو ئابادی بچن له جادهێ ئابادیهیل بێژوی و رهشهکان له کهمین مهردم مۆعتهرز گرفتار بین که وه خاتر ئهوه دهرگیری تفهنگ وهدهسانهێ تنوتێژێک وه ناو مهردم و نیروهیل رژیم ریو دا که تا نێسفه شهو دریژه داشت . قابل باسه وه خاتر مقاومهت و وسان مهردم زامهت کیش ئابادی بێژوی ، ئهو ئابادی یه وه تهور کامل وهلاێ مامورهیل ئهمنیهتی و ئێنتزامی رژیمهو محاسرهو و هاتن و چیین وه ناو ئهو ئابادی یه قهێخه کریایود .
فهزاێ ئهمنیهتی له شار سنه رۆژ وه رۆژ تنترهو بود :
له شار سنه خهوهر رهسی یه حال و رۆژ له ئهو شاره رۆژ وه رۆژ ئهمنیهتی و نێزامی ترهو بود . له دریژهێ ئێ خهوهره هاتیود : نیروهیل ئێنتزامی ، بهسیج وه دلنگ شهخسی له وهر دیواێ مقاومهت و وسان یهکگرانهێ مهردم له نواێ مراسم حۆکومهتی 13 ئابانمانگ وه شێوهێ پڕ رهنگ ترێک له ناو شار سنه ، سهر و گوشیان پیا بی یه . مهئمورهیل و مزدورهیل رژیم ههر وهێ جوره دهس وه ئهوپا کردن پۆستهیل ئیست و پرس و جور کردن له جادهیلێک که وارد شار بون وه خیاوانهیل ئهسلی شار دانه وه دهس وه ئهزیهت و ئازار شاروهندهیل سنهیی وه ئهوهیش فرهتر جهوانهیل دهن . فهزاێ شارهیل کوردستان دیواێ له دار دان ئێحسان فاتاحیان که پهنجشهمهێ لێیهوهر یهکم سالرۆژ له دار دان ئهیو وهلاێ کار وهدهسهیل رژیم جمهوری ئێسلامی یهو له شار سنه بی نائارام بی . دیواتر ئێعدام فهرزاد کهمانگهر ، شیرین ئهلهم هۆلی ، عهلی حهیدهریان ، فهرهاد وهکیلی وه مێهدی ئێسلامیان له زندان ئێوین تێران بائس بی ئهو نائارامیهیله رۆژ وه رۆژ فرهترهو بون وه مهردم کورد دهس وه یهێ ئێعتساب گهورا دان وه له فرێک وه شارهیل کوردستان دکان و مهغازهیل و جی کهسپ و کار خۆیان بهسان . که خهشم کار وه دهسهیل رژیم وه شوێن خۆێ یهو داشت تا حهدێک که دهس وه کارهیل تروریستی دان ئهراێ یهکه وه ئهو بهانه ، فهزاێ شارهیل کوردنشین ئهمنیهتی و نێزامییهو بکهن وه جهو ترس و وهحشهت وه ناو مهردم حاکم بکهن . چهن ههفته لێیهوهر تهقینهوێک وه شار مههاباد وه وهخت رژهێ نیروهیل نێزامی بائس کۆشیان چهن کهس بی وه دیواتر 2 کهس تفهنگ وهدهس نهناسیاێ وه رهولاێ مهئمورهیل ئێنتزامی له مهێدان ئێقبال شار سنه تیرهنازی کردن که بائس کۆشیان 4 مامور دهولهتی وه یهێ شاروهند ئادی بی . دهس وه جی دیواێ ئهو تهقینهوهیله فرێک وه مهردم کوردستان کار وهدهسهیل خۆد رژیم وه ئامل ئهو کارهیله وه کوردستان زانسن .
تیرنازی وهرهولاێ کاسبکارهیل مهنتهقهێ مهرزی مهریوان دریژه دێرێ :
خهوهرهیل رهسیاێ له شار مهریوان نیشان له یه دێرن مامورهیل نیرو ئێنتزامی رژیم وهگهردێ تیرهنازی ورهولاێ کاسبکارهیل له مهنتهقهێ مهرزی بایوه ێ مهریوان کهسێک وه ناو جهمال زهخمی کردنه . له دریژهێ ئهو خهوهره هاتیود ، دیواێ ئهو ئێتفاقه ، کاسبکار زهخمی ئهراێ دار و دهرمان کل کریاس ئهراێ یهکێک له شارهیل باشوور کوردستان . وه ههر له ئهو رابته فشار وه بان کاسبکارهیل مهرزی له شار مهریوان دریژه دێرێ،خهوهرهیل رهسیاێ له مهنتهقهێ مهرزی بایوه سهر وه شار مهریوان نیشان له یه دێرن مامورهیل ئێنتزامی رژیم جمهوری ئێسلامی شمارێک تر له ولاخهیل بارکیش کاسبکارهیل مهرزی تهلهف کردیانه وه قهێرێک له ئهسپاو و ئهساسیهێ ئهوان وه ئاگر کیشانه . رۆژ جۆمئه 21 ئابانمانگ ، مهئمورهیل ئێنتزامی رژیم له مهنتهقهێ بایوه سهر وه شار مهریوان 6 ولاخ بارکیش کاسبکارهیل مهرزی تهلهف وه فرهتر له 120 گالۆن نهفت و بنزین ئهوان وه ئاگر کیشایون . له دریژهێ ئێ خهوهره هاتیود : نهفت و بنزین کاسبکارهیل له ناو پڕ و پیوش و جهنگهلهیل ئهو مهنتهقه وه خاتر ههرچی فرهتر سزانن جهنگهلهیل مهریوان وه ئاگر کیشانه . له ناو مانگهیل لێیهوهر بهش وهرچاوێک له جهنگهلهیل نهوار مهرزی کوردستان وه دهس نیروهیل ئێتلائات وه بهانهێ نوا گرتن له هاتن پێشمهرگهیل ئهراێ ناو خاک خوهرههلات کوردستان ئاگر دریان . نکتهێ قابل باس له ناو ئێ خهوهره یه سه که مهئمورهیل رژیم ئاخۆندی له کوردستان حهتا وه ولاخهیل بهسهزوان ههم رهحم نیهکهن وه ئهوان ههم ئهو وهر گۆله دهن تا کاسبکارهیل له ئهوانه ئێستفاده نهکهن .
دریژهێ ئهو دهیشت کردن کارگهرهیل له شرکهت رێسازهیل کرماشان :
خاون کار شرکهت رێسازهیل کرماشان له دریژهێ سیاسهتهیل زد کارگهری خۆێ وه ناو چهن رۆژ لێیهوهر ، شمارێک تر له کارگهرهیلێک که وه ئهو شرکهته کار کردن ئهو دهیشت کرد . خاون کار شرکهت رێسازهیل وه ناو چهن رۆژ لێیهوهر دهس کهم 30 کهس وه کارگهرهیل شاغل بهشهیل فهنی ، تهولید وه ئهو دیواێ بهشهیل ئهو شرکهته وه بهانهێ وه ئاخر هاتن قهراردادهیل کاری له کار بێکار کردیاس . قابل باسه خاون کار ئهو شرکهته وهرجله یهیشه 30 کارگهر تر وه بهانهێ وه ئاخر هاتن قهرارداد کاری له کار بێکار کردیود .
بازار دهسفروشهیل شار ئیلام ئاگر گرت :
ئێوارهێ رۆژ سێشهمه بازار دهسفروشیل شار ئیلام تیوش ئاگر بیود . وه ناو خهوهرهیلێک که له ئهو رابته وه دهس ئیمه رهسیاس هاتیود : ئهو ئاگره دیواێ ساتونیمێک کۆشیایدهو . جاێ خۆشحالی یه که ئهو ئاگره خسارهت گیانی ئهراێ شاروهندهیل زامهت کیش ئیلامی نیاشتیه . وهلی وه داخهوه وه ناو ئهو ئاگره فرێک وه جی کهسپ و کار دهسفروشهیل که وهرد چو درس بیون سزیایون . شاردار ئیلام وهتیود له بارهێ ئلهت یا ئلهتهیل ئهو ئاگره وهلاێ کارناسهیل ئاگر نیشانی یهو پرس و جور کریهێ . نزیک وه 70 دهسفروش له ئهو بازارچهێ دهسفروشی شار ئیلامه مهشغول کهسپ و کارن .مهردم ئابادی گهندابهێ شیراوهند شار کودهیشت وه تنی وهلاێ کار وهدهسهیل رژیم ئاخۆندی یهو سهرکۆت بین :
خهوهر رهسنی ههرانا وه ئهو باره خهوهر دایود : دهرگیری تنوتێژ نیرو ئێنتزامی وهگهردێ مهردم غیور و نهترس ئابادی گهندابهێ شیراوهند سهر وه ئۆستان لۆرستان وه تهقانن تیر ههوایی و ئێستفاده له نارهنجک سهوتی و گاز ئێرمس هار رهسیود . له دریژهێ ئێعتراز ساکنهیل ئهو ئابادی یه نێسبهت وه رهد بی ین لولهێ نهفت له ناو زهیوهیل ئهرواوی خۆیان ، رژیم ئاخۆندی وه جی حهل کردن مشکل مهردم ، دهمهتهقه وهگهردێ ئهرواوهیل وه داین پیول زهیوهیل ئهوان ، دهس وه سهرکۆت و خۆشونهت وه زد مهردم ئهو ئابادی مهحرومه دایود . رۆژ جۆمعه 19 ئابانمانگ وه ئهو پشت سهر نان 5 رۆژ له دهسگیری 18 کهس وه ساکنهیل ئهو ئابادی یه ، جادێک که ئهراێ ناو ئهو ئابادی یه چیهێ وه دهس مهردم ئهو ئابادی یه بهسیا تا له هاتن کارکۆنهیل شرکهت نهفت وه مهئمورهیل نیرو ئێنتزامی نوا بگرن . له نواێ ئهو کاره مهردمه که له دهفا له حهق تهبیعی خۆیان ئهنجام دان ، نیرو ئێنتزامی رژیم وهگهردێ ئێستفاده له ئهسلهحه ، وه مهردم مۆعتهرز حهمله کردن که وه ئهو ناوه چهن کهس زهخمی بین .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .