راپۆرت
خهتیبی له بارهێ علهت یا علهتهیل کهم بی ین ماملهیل نهفتی ئێران وهگهردێ ئهو 2 ولاته وه وهخت خاس بی ین دووارهێ ماملهیل نهفتی چشت فرهترێک نهوهت . قسه و باسهیل خهتیبی وه وهختێک ولاوهو بون که وه ناو رۆژهیل لێیهوهر ، راپۆرتهیلێک له بارهێ تهسمیم شرکهتهیل گهوراێ چینی له بارهێ کهم کردن ماملهیل نهفتی وهگهردێ جمهوری ئێسلامی ولاوهو بیون . وه ناو ئهو راپۆرتهیله هاتیود : وهگهردێ فره بی ین شمار مووافقهتهیل نهفتی چین وهگهردێ ئێمریکا ، دهوولهت چین وه شێوهێک نارهسمی له شرکهتهیل نهفتی ئهو ولاته تواسیه تا له چوارچێوهێ تهحریمهیل یهێ تهرهفهێ ئێمریکا له ئێنازهێ هاوکاری وهگهردێ ئێران کهمهو بکهن . خهوهر رهسنی رویترز وه ئێ باره وه ناو راپۆرتێک نویسایود : له وهخت دهر کریان تهحریمهیل تازهێ نهفتی ئێمریکا وه زد ئێران ، شرکهت ملی نهفت چین وه شرکهت ملی نهفت فلات قارهێ چین که 2 شرکهت گهوراێ نهفتی ئهو ولاته وه حساو چن ، ههول و تلاش فرێک کردنه ئهراێ چیین فرهتر و وهرولاوتر وه ناو بازارهیل ئێمریکا . ئهوهلهیل مانگ لێیهوهر ، شرکهت ملی نهفت فلات قارهێ چین ، قهراردادێک وهگهردێ یهێ شرکهت ئێمریکایی وه خاتر پیا کردن و دهر هاوردن گاز له ناو خاک ئێمریکا وه ئێمزا رهسان وه شرکهت ملی نهفت چینیش مانگ لێیهوهر ئێعلام کردیود وهگهردێ هاوکاری شرکهت ئێمریکایی شورون له ناو یهێ تهرح پیا کردن گاز له ولات ئۆسترالیا ، سهرمایهێ خۆێ ئهو کار خهێ . تهحریم یهێ ترهفهێ ئێمریکا وه زد ئێران جیا له تهنبیههیل جهانی دهر کریاێ وهلاێ شهوراێ ئهمنیهتهو وه کار چی یه وه فرهتر سهنعهت نهفت و گاز ئێران ههدهف قهرار داس . قانون ئێمریکا له بارهێ تهحریم یهێ ترهفهێ ئێران ، نواێ هاوکاری شاروهندهیل و شرکهتهیل ئێمریکایی وهگهردێ ئێران له زهمینهیل دیاری کریاێ له ناو ئهو قانونه گرێ ، وهلی فرهێک له شرکهتهیل غهێر ئێمریکاییش له ترس مشکل درس بی ین له دهس کهفتن ئهوان وه بازارهیل ئێمریکا وه هاوکاری وهگهردێ شرکهتهیل ئێمریکایی وه ئهو تهحریمهیله پهیرهوی کردنه . کارناسهیل ئیوشن وه خاتر چیین فرهتر شرکهتهیل چینی وه ناو بهش ئێنرژی ئێمریکا وه بان ئێنازهێ تهعسیر قهبوول کردن ئهوان له نواێ تهحریمهیل یهێ ترهفهێ ئێمریکا ئێزافه بود . وه ناو سالهیل لێیهوهر ئێران وه یهکێک له ولاتهیل تهعمین کهر ئهسلی نیازهیل نهفتی چین گویهریاس وه ئێنازهێ کل کریان نهفت ئێران وه ئهو ولاته وه تنی ریو له فره بی ین بی یه ، وه وهرجله دهر کریان قهتنامهێ تازهێ شهوراێ ئهمنیهت ، له ناو ئێران ئێ نهزهره مهترهح بیود که چین نواێ دهر کریان ئێ جوره قهتنامهێک گرێ . ئێگه وهگهردێ ئهو دهیشت چیین فرهێک له شرکهتهیل دهرهوه له تهرح پیا کردن و چالاک کردن سهرچاوهیل نهفت و گاز ئێران وه ئههمیهت چین وه ئۆنوان ترهف ئهسلی هاوکاری وهگهردێ ئێران ، نگرانی جمهوری ئێسلامی له ئێحتمال وه ئاخر هاتن ئهو هاوکارییهیله ، فرهترهو بی یه . ئیوشیهێ تهئسیسات نهفتی ئێران وه گرتن سهرمایه و فهن و تکنیک دهرهوه ئهراێ دریژهێ تهولید و سادرات ئێحتیاج دێرێ وه ئهو دهیشت چیین شرکهتهیل دهرهکی ، نگرانیهیلێک له بهش ئێنرژی ئهو ولاته درس کردیاس . شرکهتهیل چینی جارێک له چهن تهرح نهفت و گاز ئێران چالاکن ، وهلی خهوهر رهسنی رویترز وه نهقل له برێک سهرچاوهیل نهفتی ، خهوهردایود چالاکی ئهسلی ئهو شرکهتهیله وه جی عهمهلیات مهێدانی له ولاوی و خاس کردن سهرچاوهیل ، فرهتر وه بان چالاکیهیلێک جور کارهیل دهفتری ، نهقشه کیشان وه تهراحی کردن بهرنامهیل ئایهنده کووهو بی یه . دیواێ دهر کریان قهتنامهێ تازهێ شهوراێ ئهمنیهت وه ئهو دهیشت دریان تهحریمهیل یهێ ترهفهێ ئێمریکا و ئۆروپا وه زد بهرنامهیل ئهتۆمی ئێران ، ژاپۆنیش تهسمیمهیلێک له بارهێ هاوکاری شرکهتهیل خۆێ وهگهردێ ئێران وه ئهوهیش فرهتر له بارهێ سهرمایه ئهو کار خسن له بهش ئێنرژی گرتیاس . ئێران وه تهعمین کهرهیل ئهسلی حهوهجهیل نهفتی ژاپۆنه ، وهلی کار وهدهسهیل ژاپۆنی تا ئێگه له بارهێ کهمهو کردن ئێنازهێ سهنن نهفت له ئێران دهمهتهقهێک نهکردنه . تهحریم نهفتی ئێمریکا وهختێک وه ئێجرا نریاس که بازار جهانی نهفت ، جارێک له حالهت رکود نێسبی وه سهر بهێ وه کهم بی ین تهولید و فرهتن نهفت و گاز وهلاێ ههر کام له تهولید کهرهیل وهرچاو ئهو جنسهیله وه ئاسانی وهلاێ ئهو دیواێ ولاتهیل تهولید کهرهو جبران بود .
+ نوشته شده در چهارشنبه دوازدهم آبان ۱۳۸۹ ساعت 21:27 توسط نهورۆز ئازاد پوور
|
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .