زهردی خوهر ئێواره نیشان دهر رێیکه که توام له بارهێ ئهوه بنوسم ، خش خش وهلنگ ژێر پاییلم ئیوشێ : بیلا بکهفی ، ئهو وهخت رێ ئازادی پیا کهیدن .
هاورێ ئێحسان سال 1360 له شار کرماشان له دالگ بی . ئهو هاورێیهمانیش جور هزارهیل ئێنسان کورد ولاتهکهمان له جهور و ستهم و بێ ئهدالهتیێک که نیشتمانهکهێ ڕنییهسهو وه تهنگ هات وه شارهکهێ وه ئۆمید پیا کردن وه رهسین وه ههواێک تازهتر وه جی هیشت . هاورێ ئێحسان فتاحیان سال 1384 وارد هێز پێشمهرگهێ کۆمهله بی وه له ئۆره دیواێ ئهو پشت سهر نان دهورهێ سیاسی نێزامی هێز پێشمهرگهێ کۆمهله رهسمهن وه جهم پێشمهرگهیل کۆمهله ئێزافه بی . شههید ئێحسان وه خاتر ئهخلاق و مهنش کۆمهلایهتی وه جۆربزه و نهترسیێک که داشت فره زیو له ناو دڵ هاوریانێ جی خۆێ کردهو وه بی وه یهکێک له ئهندامهیل باوهر وه پێ کریاێ کۆمهله . هاورێ ئێحسان جور ئهو دیواێ هاورێیهیل ترمان ، فره جار دلێ تهنگ بودن ئهراێ خاک و ولات و خانواده و کهس و کارێ ، ههر وه ئهو خاتره چهن جار تهسمیم گرێ وه تهوهجو وه گشت خهتهرهیلێک که یهێ پێشمهرگه له ناو خاک نیشتمان تههدید کهێ سهردان ولاتهکهێ بکهێ ، که جارێک وه داخهوه له تاریخ 29 تیر مانگ سال 1387 ئهو ئهزیزه پاێ شکیهدو له مهنتهقهێ کامیاران کهفێده دهس نیروهیل جاش و پاسدار رژیم وه برێد ئهراێ ئێدارهێ ئێتلائات رژیم وه شار کامیاران . دیواتریش دیاره هاورێ ئێحسان کل کریهێ ئهراێ ئێدارهێ ئێتلائات شار سنه وه لهوره کهفێده ژێر تن ترین شکهنجهیل جنایهتکارهیل رژیم ئاخۆندی . دادگا ئێنقلاب شار سنه هاورێ ئێحسان وه ئێتهام ئهندامیهت له کۆمهله وه تهبلیغ وه زد نێزام وه 10 سال زندان وه تهبعید ئهراێ شار رامهۆرمۆز مهحکوم کرد وهلی دیواتر دادستان له دادگا دوواره نهزهر دهر ئێدئا کرد که ئهو حۆکمه مۆلایم و کهمه وه حۆکم ئێعدام ئهراێ ئهو هاورێیهمان برییهو . گویهریان ئهو حۆکمه ئهراێ فره کهس حهتا کار وهدهسهیل خۆد رژیم عهجیب و قهریب بی ئهراێ یهکه وه بان قانونهیل ساختهگی خۆد رژیم که ئیوشێ ئهگهر حۆکم دهر کریاێ له دهس کهم مۆجازات تهسویب کریاێ کهمتر نهود ، بایه حۆکم مۆجازات کهمهو بکریهێ نه فرهتر ، وه دوواره وه بان قانونهیل خۆد ههر ئهو رژیمه مۆجازات دژمنی وهگهردێ خۆدا که وه شههید ئێحسان دریایود تهنیا یهێ سال یا کهمێک فێشتره . وهلی ههر وه ئهو جوره که وهتیم حۆکم هاورێ ئێحسان له 10 سال زندان وه ئێعدام گویهریا . ئهو حۆکمه ئێعترازهیل وهرولاوێک له ناو و دهیشت ئێران وه شوێن خۆێ یهو داشت ، له زندانیهیل سیاسی ناو ئێران گرتیاس تا گشت چالاکهیل حۆقوق بهشهر و سیاسی وه ناو و دهیشت ئێران . وهلی وه داخهوه گوش کار وهدهسهیل جنایهتکار رژیم ئاخۆندی هیچ چشت نهشنهفت وه چهو ئهوان وه گشت چشت کور بی وه له ناو دهم وهرهسو 20 ئابانمانگ پارهکه هاورێ ئێحسان له دار دریا ، وه وهێ جوره لاپهرێ سیهێ تر وه دهفتهر جنایهتهیل رژیم ئێزافه بی و شههیدێک تر وه ناو جهم شههیدهیل رێ ئازادی و دموکراسی کورد و کوردستان .
یاد هاورێ ئێحسان بێ گۆمان له لاێ گشت لاێک که خوازیار سۆلح و سهفا و ئازادیێن بهرز و گرامی یه
نهکهی دالگه نهکهی ئهرام شین بکهی
نهکهی بخلهتیهی دڵ دژمنهکانم شاد بکهی
ئامان دالگه نهکهی وهملهرۆ
نهکهی ناو دڵ هاوریانم بکهی چوڵ
نهکهێ سیه بکهیته وهر له ناو خیاوان
دژمن بیونهێ خهم و پهژارهێ باوان
م کۆره شههیدهکهێ رێ ئازادیێم
بالابهرزهکهێ له ناو جهم دیاریێم
یه رهسم ئێ دنیاس وهێ تهوره بی یه
ههر که حهق بیوشێ زنهی وه کامێ نی یه
مهرگ بێ گۆمان ئێشارێکه وه زنهی تر
یه ههر ئهو چشتهسه زوان دژمن کێدن بڕ
نهکهی دالگه نهکهی ئهرام شین بکهی
نهکهی بخلهتیهی دڵ دژمنهکانم شاد بکهی
13 ئابان وه مشکل و دهردسهر مهردم ئێران وه خاتر ئێتفاقهیل ئهو رۆژه :
رۆژ 13 ئابانمانگ که چهن رۆژ لییهور سالرۆژ ئهوه بی وه له ناو ئێران مهراسمهیل زورهکی و حۆکومهتیێک ههر وه ئهو جوره که له ناو خهوهرهیلمان وه پێ ئێشاره کردیم وه مناسبهت ئهو رۆژه گریا ، سالرۆژ 3 ئێتفاقه که ههر کام وه ئهوانه چه ئهراێ جمهوری ئێسلامی وه چه ئهراێ مهردم ئێران تیوهنێ مهم بود وه وه رهحهتی له هیورهو نهچوود ، ئهوهل ئێتفاق که فرهتر ئهراێ کار وهدهسهیل رژیم فره مهمتره وه ههمیشه له ئهوه ئێستفادهیل سیاسی وهرچاوێک کردنه ، تهبعید وه یا کێل کریان خۆمهینی ئهراێ تۆرکیهس که له ناو رۆژ 13 ئابانمانگ 1343 ئهنجام گرت ....سناتور ئێمریکایی له ئێحتمال شهر وهگهردێ ئێران ئیوشێ :
یهێ ئهندام جمهوری خواز مهجلس سناێ ئێمریکا وهتیاس : ئهگهر دهولهت باراک ئۆباما رهئیس جمهور ئێمریکا تهسمیمێک تن تر و نهترسانه تر له نواێ بهرنامهێ ئهتۆمی جمهوری ئێسلامی بێرێ ، تیوهنێ وه بان پشتیوانی جمهوری خوازهیلێک حساو بکهێ که چهنێک لێیهوهر فرێک وه کۆرسیهیل مهجلس نمایهندهیل ئهو ولاته وه دهس هاوردنه .ئهحمهد خاتمی له ناو قسیهیلێک که فرهتر وه تهنز نزیکه ئێدئا کرد : 170 سایت دهرهکی وه زد تهرح ههدهفمهند کردن سوبسیدهیل کار کهن :
ئهحمهد خاتمی له نماز جۆمئهێ پهس پێرهکهێ تێران له بهرنامه رهشانن رسانهیل دهرهکی وه زد قانون ههدهفمهند کردن سوبسیدهیل وه نهقش مهم ئاخۆندهیل ، رابتهێ نێزام وهگهردێ حهوزهێ علمیه وه مهرجهیل تهقلید قسیه کرد .دهولهت نیجریه وهتیود : بار ئهسلحهێ نواگریاێ له ئێران هاتیاس :
دهولهت نیجریه ئێعلام کردیاس : پرس و جورهیل سهرهتایی نیشان دهێ یهێ بار ئهسلهحه که وه ناو ههفتهێ لێیهوهر له بهندهر لاگوس پیا بی یه ، له ئێران کل کریاس وه هاتێ شاروهندهیل ئێرانی له ئهو کاره دهس داشتون . مهئمورهیل ئهمنیهتی و ئێتلائاتی نیجریه له ناو مانگ ئۆکتۆبر بارێک که ئهسلهحهیلێک جور راکتهیل 107 میلیمتری ، گۆلهێ تفهنگ وه ئهسلهحهیل تر له وهر گرێ له بهندهر لاگوس پیا وه زهبت کردن .
کاروهدهسهیل رژیم جمهوری ئێسلامی ئیوشن : حهوهجێک وه گویهرانن سوخت نهێریم وه پێشهاد تازێکیش نهێرتیمنه :
منوچهر مۆتهکی رۆژ چوارشهمه 12 ئابانمانگ له دهمهتهقێک وهگهردێ خهوهررهسنی دهولهتی ئێران (ئیرنا ) وه وهتن یه که گویهرانن سوخت ، فۆرمۆل خاس خۆێ دێرێ وهت : دهمهتهقه وهگهردێ گۆرو وییهن ئهراێ گویهرانن سوخت وه بان چوارچێوێک که وه شێوهێ دهقیق له ئێعلامیهێ تێران تاریف بی یه ئهنجام بود .راپۆرت سازمان ملهتهیل یهکگر وه بارهێ نرخ بێکاری له ئێران :
راپۆرت دیاری کهر تهوسعهێ ئێنسانی سازمان ملهتهیل یهکگر نیشان دهێ نرخ بێکاری له ئێران له ناو سالهیل 2000 تا 2009 وه رهقهم له سهدا 33 رهسی یه . تهوسعهێ ئێنسانی یهکێک وه نیشانهیل دیاری کهر رشت و پێش کهفتن ولاتهیل وه حساو چود که ههر ساله له لاێ سازمان ملهتهیل یهکگرهو ولاوهو بود . دیار دهر پێش کهفتن ئێنسانی ناو جهدوهلێکه تهناسۆبی که له ئهوه وه بارهێ ولاتهیل دنیا وه بان فاکتورهیلێک جور دهرامهد راستین مهردم ، نرخ سهواد مهردم ، ئاموزش ، بێهداشت ، تهغزیه وه ئۆمێد داشتن وه زنهی ، پرس و جور و مقایسه کریهێ .
مهراسم حۆکومهتی 13 ئابانمانگ وه فشار فرهتر وه بان مهردم شار سنه :
وه ناو خهوهرهیلێک که له شار سنه ولاوهو بینه هاتیاس : رۆژ پهنجشهمهێ لێیهوهر هاووهخت وهگهردێ ئهوپا بی ین مهراسم حۆکومهتی 13 ئابان ، فهزاێ حاکم وه ئهو شاره وه تنی ئهمنیهتی یهو بیود وه نیروهیل رژیم دهس وه ئهزیهت و ئازار مهردم شار سنه دایون .دهر کریان حۆکم زندان ئهراێ 2 کهس له شار سهقز :
دهسگا قهزایی رژیم جمهوری ئێسلامی له شار سهقز 2 کهس وه ناوهیل ئباد شهیخی وه کاوهێ غهفاری وه تهرتیب وه ئهو پشت سهر نان 18 و 12 مانگ زندان مهحکوم کردیاس . ئهو 2 کهسه که له ناو سال 88 وهلاێ نیروهیل ئهمنیهتی رژیمهو دهسگیر بیون وه دیواێ قهێرێک وهگهردێ قهرار وهسیقه له زندان ئازاد بیون وهلاێ دهسگا قهزایی رژیمهو وه ئێتهامهیل دایمی خۆیان چالاکی تهبلیغی وه زد نێزام وه هاوکاری وهگهردێ حێزبهیل مۆخالف رژیم مۆتهههم بینه .
راپۆرت خهوهر رهسنیهیل حۆکومهتی له بارهێ ئێتفاق تیرهنازی وه مهێدان ئێقبال شار سنه :
رهسانهیل حۆکومهتی جور رۆژنامهێ رسالهت له گریان ئاملهیل ئێتفاق تیرهنازی له مهێدان ئێقبال شار سنه خهوهر دایون وه وهتیون ئهو کهسهیله ئهندام یهێ گورو ئێسلامخواز سهلهفی بینه . وه ناو ئهو راپۆرته هاتیود : له کهسهیل دهسگیر بی شمار فرێک کتاو و دهس نویسیاێ وه سی دییهیل مهربوت وه یهێ گورو ئێسلام خواز سهلهفی پیا وه زهبت بی یه . ئێ راپۆرته وه وهختێک ولاوهو بی یه که وهرجله یه کار وهدهسهیل رژیم جمهوری ئێسلامی حێزبهیل و سازمانهیل کوردی ئۆپوزسیون جمهوری ئێسلامی وه ئامل ئهو کاره ناسانیون وه له ناو ههفتهیل لێیهوهر له کۆشیان ئهو 2 کهسه که له مهێدان ئێقبال شار سنه وهرهو لاێ مهئمورهیل دهولهتی تیرهنازی کردیون خهوهر دایون .
تهرح ئێتهام و دهسگیریهیل سیاسی له کوردستان دریژه دێرێ :
خهوهرهیل رهسیاێ له شارهیل سنه و سهقز نیشان له دریژهێ تهرح ئێتهام و دهسگیریهیل سیاسی وهلاێ دهسگایل ئهمنیهتی رژیمهو دێرێ . له شار سنه خهوهر رهسی یه ، دهسگا ئهمنیهتی رژیم بێهروز تهناسۆبی که 3 مانگ لێیهوهر وهلاێ مهئمورهیل ئهمنیهتی رژیمهو دهسگیر بی یه وه له زندان وه سهر بهێ وه هاوکاری وهگهردێ یهکێک له حێزبهیل کوردی رژیم مۆتهههم بی یه . له ناو خهوهر تر هاتیود : دهسگا ئهمنیهتی رژیم محهمهد مهجید زاده که ههفتهێ لێیهوهر وهلاێ مهئمورهیل ئهو دهسگاوه له شار سهقز دهسگیر بی یه وه له زندان وه سهر بهێ ئهیویش مۆتهههم وه هاوکاری وهگهردێ حێزبهیل کوردی مۆخالف رژیم بی یه .
ئازادی یهێ چالاک سیاسی وه داین وهسیقه :
خهوهرهیل رهسیاێ وه شار بوکان نیشان له یه دێرن ، زندانی سیاسی خالد پور ئهحمهد وه داین وهسیقه له زندان ئازاد بی یه . زندانی سیاسی خالد پور ئهحمهد که وهگهردێ قهرار وهسیقهێ 50 مێلیون تمهنی له زندان ئازاد بی یه له لاێ دهسگایل قهزایی و ئهمنیهتی رژیمهو مۆتهههم وه هاوکاری وهگهردێ یهکێک له حێزبهیل مۆخالف رژیم بی یه . ئێتهامێک که له خوهرههلات کوردستان وه فرێک له چالاکهیل سیاسی ، فهرههنگی ، ئهدهبی وه کۆمهلایهتی دریهێ وه فرێک له جهوانهیل کورد وه خاتر ئهو ئێتهامهیله ئهراێ زندان کل کریهن وه فره جاریش وه داخهوه بائس مهرگ چالاکهیل کورد بود که چه له ژێر شکهنجه گیانیان له دهس دهن وه چه له دار دریهن .
زهخمی بی ین دهههیل کهس وه خاتر ئێتفاق زیولهرزه له شار دورود :
رۆژ شهمه 15 ئابانمانگ ئێتفاق کهفتن زیولهرزێک وه تنی 4 و 9 دههم ریشتر له شار دورود سهر وه ئۆستان لۆرستان بێجله خسارهت مالی فره ، دهس کهم 119 زهخمی وه جی هیشت . شار دورود وه ئۆستان لۆرستان 112 هزار جمعیهت دێرێ وه کهفێدهو پاێ رشته کیوهیل زاگروس وه له نزیکی ئێشترانکویه قهرار دێرێ .
دهر کردن حۆکم زندان ئهراێ یهێ چالاک کۆمهلایهتی له شار مهریوان :
دهسگا قهزایی رژیم له کوردستان ئهراێ چالاک کۆمهلایهتی شار مهریوان ئهحمهد باب حۆکم 14 سال زندان تهعزیری دهر کردیاس . دهسگا قهزایی رژیم ئهحمهد باب که 33 رۆژ وه سلول تهک کهسی یو خسیود وه شکهنجهیل فرێک له حهق ئهیو رهوا زانسیود وه ئێتهام هیچ و پوچ چالاکی تهبلیغی و جاسوسی ئهراێ ولاتهیل بێگانه وه ئهندامیهت له حێزبهیل مۆخالف رژیم له مهجمو وه 14 سال زندان تهعزیری مهحکوم کردیاس . قابل باسه ئهحمهد باب 5 شاریوهر مانگ پارهکه دیواێ ئهو پشت سهر نان 195 رۆژ زندان و شکهنجه وهگهردێ قهرار وهسیقهێ 700 مێلیون تمهنی وه تهور مووهقهت له زندان ئازاد بیود .
تنو کردن فرهتر جهو ئهمنیهتی و نێزامی له شارهیل کوردنشین خوهرههلات :
راپۆرتهیل ولاو بی له تن بی ین فهزاێ ئهمنیهتی حاکم وه ئۆستانهیل کورد نشین خوهرههلات کوردستان له نزیک بی ین وه وهخت وه ئێجرا دهر هاتن تهرح ههدهفمهند کردن سوبسیدهیل خهوهر دهن . دهسگایل ئهمنیهتی و ئێنتزامی رژیم وه بردن و کووهو کردن شمار فرێک له نیروهیل زد شۆرش و دلنگ شهخسی له وهر خۆیان له جی یهیل مهم دهولهتی وه ئهوپا کردن مانورهیل نێزامی له ناو شارهیل جوراوجور ئۆستانهیل کوردستان ، کرماشان ، ئیلام وه لۆرستان ، فهزاێ ئهمنیهتی حاکم وه ئهو شارهیله تن ترهو کردنه . تهسمیم وه گرتن رهوشهیل ئهمنیهتی وه مانورهیل رژیم له ترس ئهو پا بی ین ئێعترازهیل ئۆمومی له ئهکسۆلئهمهل وه فره بی ین تنوتێژ نرخ مهواد خواردهنی وه جنسهیل ئهساسی له نزیک بی ین وه وهخت ئێجراێ تهرح ههدهفمهند کردن سوبسیدهیل ئهنجام گرتیاس . ئهراێ یهکه کار وه دهسهیل رژیم خۆیان خاس زانن حال و رۆژ مالی و ئێقتسادی مهردم کورد فره خراوتر وه جی یهیل تر ئێرانه وه له سورهت لاوردن سوبسیدهیل ، یهکم جاێک که مهردماکهێ فشار فرهترێک دیونن وه شایهد خاستره بیوشیم سهنن نان وشک خالی ئهرایان سهخترهو بود یه مهردم کورد وه کوردستانن ، مهردمێک که وه تنی له بێکاری رهنج بهن وه نرخ بێکاری له ئهو جی یه له ئێران نێسبهت وه شارهیل تر فره هاله بان تر وه ههر وهێ خاترهسه که کار وه دهسهیل رژیم وه تنی نگران ئێعتراز وه شۆرش مهردم له کوردستانن وه توان وه ئێ رهوشهیل خۆیانه که رهوشهیل تازێک ههم نیێن ، مهردم رخ بهوهن تا لا ئهودهیشت هاتن ئێحتمالی ئهوان ئهراێ ئێعتراز وه ئهو تهرح دهولهته نوا بگرن .
دهر کریان حۆکم سهنگین زندان وه خاتر هاوکاری نهکردن وهگهردێ وزارهت ئێتلائات :
مۆختار هۆشمهند نهقاش و چالاک فهرههنگی خهلک شار مهریوان وه خاتر قهبوول نهکردن خوازیار کار وهدهسهیل وزارهت ئێتلائات رژیم ئهراێ هاوکاری وهگهردێ ئهوان که وه پێ وهتیون بایه له تلویزیون ئێعتراف بکهی وه 16 سال زندان مهحکوم بی یه . دهسگا قهزایی رژیم له شار مهریوان ئهو هۆنهرمهنده وه ئێتهام جاسوسی ، تهبلیغ وه زد نێزام وه هاوکاری وهگهردێ حێزبهیل و سازمانهیل ئۆپوزسیون وه 16 مانگ زندان مهحکوم کردیاس . ناوبریاێ چهنێک لێیهوهر ئهراێ زندان ئێدارهێ ئێتلائات شار سنه کێل کریایود . قابل باسه بێهزاد کوردستانی ، ئهمیر ئهمانیان ، قادر شیری وه ئهزیز ناسری له شائرهیل و چالاکهیل ئهرسهێ فهرههنگ و ئهدهب کوردستانن که له ناو مانگهیل لێیهوهرهو وهلاێ مهئمورهیل ئهمنیهتی رژیمه دهسگیر بینه .
دریژهێ دهر کردن کارگهرهیل مجتهمهێ گاوداری شههرهک حهسهن ئاواێ شار رهوانسهر :
وه ناو خهوهرهیل رهسیاێ وه شار رهوانسهر هاتیود : خاون کار مجتهمهێ گاوداری شههرهک حهسهن ئاواێ شار رهوانسهر دهس وه دهر کردن 6 کارگهر ئهو مجتهمه داس . ئهو کارگهرهیل قهراردادی دهرکریایه وه ناوهیل ئهحمهد قۆبادی ، حهسهن مۆزهفهری ، رهمهزان ویژه ، ئهدنان رهحیمی ، ئۆسمان رهحیمی وه سوفی جهوکار ، ههرکامیان له ناو 5 تا 22 سال سابقهێ کار دێرن . قابل باسه له قهێرێک لێیهوهرهو پروسهێ دهرکردن کارگهرهیل ئهو گاوداری یه دهس وه کار کردیاس وه جارێک ههم ئێ جوره که دیاره وه خهوهرهیل ئهوه وه دهس ئیمه رهسێ دریژه دێرێ .
بهردوامی بردن ئهندامهیل کانون سێنفی مۆئهلمهیل کرماشان :
دادگا ئێسلامی رژیم له شار کرماشان 2 کهس له ئهندامهیل شهوراێ مهرکهزی کانون سێنفی مۆئهلمهیل کرماشان وه ناوهیل محهمهد تهوهکۆلی وه ئهلی سادقی ئێحزار کردیاس . دادگا ئێسلامی رژیم ، ئێتهام محهمهد تهوهکۆلی وه ئهلی سادقی که بایه رۆژ 19 ئابانمانگ له شۆعبهێ یهکم ئهو دادگا وه شار کرماشان حازر بون ، چالاکی تهبلیغی وه زد نێزام له قهلهم داس . قابل باسه وهرجله یه دهسگا قهزایی رژیم ههر کام له کهسهیل ناوبریاێ وه ئێتهام هیچ و پوچ له یهک شێوانن نهزم ئاموزش و پهروهرش له رهێ ئهوپا کردن کووهو بی ینهیل غهێر قانونی و تهعتیلی مهدرهسهیل وه داین 200 هزار تمهن جهریمهێ نهقدی مهحکوم کردیود .
تهسادف ماشین له کوردستان رۆژههلات وه خاتر جادهیل گهن و نائێستاندارد دریژه دێرێ :
وه ناو خهوهرهیلێک که وه دهس ئیمه رهسیه هاتیاس ، له ئابادی سهرتهنگ سهر وه شار ئهیوان وه خاتر لهیهک دان شاخ و شاخ یهێ دهسگا پژو و یهێ دهسگا موتور سیکلت وهداخهوه جهوانێک وه ناو شارهزا مۆزهفهری جی وه جی گیانێ له دهس داس و جهوانێک تر وه ناو ئهبوزهر وه تنی زهخمی که له حالهت کۆما وه سهر بهێ . خهوهرهیل رهسیاێ له شار بوکانیش نیشان له یه دێرن وه داخهوه وه خاتر یهێ تهسادف مهرگوار له ناوێن شارهیل سهقز _ بوکان ، 5 کهس که له ناو یهێ سهواری بیون له ناو ئاگر سزیانه . دۆشهمه شهو گۆزهریاێ 10 ئابانمانگ ، لهیهک دان یهێ دهسگا سهواری پژو پارس وهگهردێ یهێ دهسگا کامیون له کیلومتر 18 جادهێ سهقز بوکان ، بائس گیان له دهس دان 5 مسافر ماشین سهواری له ناو بلوزهێ ئاگر بی . ههر وه ئهو جوره که ئێشاره بی جادهیل خراو کوردستان له مهرحهلهێ ئهوهل وه بێ دقهتی و کهم تهجربهگی راننهدهیل له مهرحهلهێ دێم وه داخهوه دایم بائس کۆشیان مهردم وه ئهویش فرهتر جهوانهیل بود .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .