خه‌وه‌ر

 تیم توپان شیرین فه‌راز کرماشان له‌ ئێران جه‌وان بوشهر باخت :

تیم توپان شیرین فه‌راز کرماشان له‌ هه‌فته‌ێ هه‌فتم مسابقه‌یل لیگ ده‌سه‌ یه‌ک ئێران یه‌ک سفر له‌ تیم توپان ئێران جه‌وان بوشهر شکه‌ست خوارد . ته‌نیا گۆل ئه‌و وازی یه‌ وه‌لاێ فوتیکه‌وه‌ یه‌کێک له‌ توپانکه‌ره‌یل ده‌ره‌کی تیم ئێران جه‌وان بوشهر وارد ده‌روازه‌ێ تیم شیرین فه‌راز کرماشان بی . ئه‌و مسابقه‌ رۆژ جمعه‌ له‌ نواێ چه‌و فره‌تر له‌ 7 هزار تماشاکه‌ر کرماشانی له‌ وه‌رزشگا ئازادی کرماشان ئه‌و پا بی . مه‌جید ئاقا جه‌ری سه‌رمره‌بی تیم توپان شیرین فه‌راز کرماشان گه‌ن قه‌زاوه‌ت کردن داوه‌ر مسابقه‌ بائس نه‌وردن ئه‌و وازی یه‌ وه‌لاێ وازی که‌ره‌یل تیمه‌که‌ێیه‌و زانسیود .

راپۆرت

چقا ئاهووان گه‌وراترین مه‌حوه‌ته‌ێ وه‌رجله‌ تاریخ له‌ ده‌یشت مێهران ئیلامه‌ :

باستان ناس و سه‌رپره‌س پروژه‌ێ لایه‌ نگاری چقا ئاهووان ، ئه‌و مه‌حوه‌ته‌ وه‌ گه‌ورا ترین و ناسیاێ ترین مه‌حوه‌ته‌ێ وه‌رجله‌ تاریخ له‌ ده‌یشت مێهران سه‌ر وه‌ ئۆستان ئیلام زانسیود ...

ادامه نوشته

راپۆرت

ره‌ئیس به‌سیج ئیوشێ : شۆکر خۆدا که‌م که‌ ته‌حریم بیومنه‌ :

ئه‌لبه‌ت مه‌حمود ئه‌حمه‌دی نژاد ، ره‌ئیس جمهوریش ، ته‌حریمه‌یل جهانی وه‌ ده‌م په‌خشه‌و ، قه‌تنامه‌یل ته‌حریم وه‌ کاغه‌ز دریاێ ته‌شبی کردیود . محه‌مه‌د رزا نه‌قدی ره‌ئیس سازمان به‌سیج مسته‌عزه‌فه‌یل ئێرانیش که‌ گۆل گزافه‌یل ئه‌حمه‌دی نژاد خواردیاس ، وه‌تیود : شۆکر خۆدا که‌م که‌ ئێران ته‌حریمه‌ ، دئا بکه‌یم که‌ هه‌ر رۆژ ته‌حریمه‌یل فره‌تره‌و بون ...

ادامه نوشته

راپۆرت

 

ئاژانس ناومله‌ته‌یل ئێنرژی ئه‌تۆمی ئیوشێ : نیه‌تیوه‌نیم سۆلح خوازانه‌ بی ین به‌رنامه‌ێ ئه‌تۆمی جمهوری ئێسلامی ته‌عیید بکه‌یم :

ئاژانس وه‌تیود : جمهوری ئێسلامی رۆژ 16 نوامبر نواێ غه‌نی کردن ئه‌ورانیوم خۆێ گرتیود وه‌لی رۆژ 22 نوامبر دوواره‌ ده‌س وه‌کار کرد ...

ادامه نوشته

راپۆرت

گامبیا وه‌گه‌ردێ جمهوری ئێسلامی قه‌ت رابته‌ کرد :

ولات گامبیا گشت رابته‌یل خۆێ وه‌ ناو هه‌فته‌ێ لێیه‌وه‌ر وه‌گه‌ردێ رژیم جمهوری ئێسلامی بڕی وه‌ وه‌ دیپلۆماته‌یل جمهوری ئێسلامی 48 وه‌خت دایود تا ئه‌و ولاته‌ وه‌ جی بیلن . گامبیا یه‌کێک له‌ بیوچک ترین ولاته‌یل ئافریقا ، که‌فتیاسه‌و‌ خوه‌رهه‌لات ئه‌و قاره‌ .

ادامه نوشته

راپۆرت

نرخ بێکاری له‌ کرماشان بانتر له‌ 30 له‌ سه‌ده‌ :

بێکاری وه‌رولاو و نه‌یون ئێمکانات شاری و روستایی وه‌ سیماێ ته‌نگ ده‌سی و فه‌قیری که‌ له‌ سه‌ر و ریو و دار و دیوار ئۆستان کرماشان وارێ ، چشتێک نی یه‌ که‌ هه‌ر مسافرێک ئه‌گه‌ر ته‌نیا جارێک له‌ کرماشان ره‌د بیود ئه‌وه‌ نه‌یود وه‌ وه‌ ئه‌وه‌ ئێعتراف نه‌که‌ێ .

ادامه نوشته

خه‌وه‌ر

 

  ده‌سگا قه‌زایی رژیم له‌ شار سنه‌ له‌ مه‌نیژه‌ێ سادقی تواسنه‌ که‌ ئه‌راێ ئه‌و نهاده‌ بچود :

له‌ ناو خه‌وه‌ر تر که‌ له‌ شار سنه‌ ولاوه‌و بیود : مه‌نیژه‌ێ سادقی له‌ تره‌ف ده‌سگا قه‌زایی رژیمه‌و له‌ ئه‌و شاره‌ وه‌ جرم چالاکی له‌ یه‌کێک له‌ ته‌شه‌کۆله‌یل مدافه‌ێ ژنه‌یل ئه‌راێ ئه‌و نهاده‌ بریاس . وه‌ ناو نامه‌ێک که له‌ تره‌ف ده‌سگا قه‌زایی رژیمه‌و‌ ئه‌راێ مه‌نیژه‌ کل کریایود نویسایود ، شاکی که‌س ناوبریاێ ئێداره‌ێ گشتێ ئێتلاعات رژیم وه‌ شار سنه‌س . مه‌نیژه‌ بایه‌ خۆێ له‌ ناو رۆژ شه‌مه‌ 6 ئازه‌رمانگ وه‌ دادیاری شۆعبه‌ێ 4 ده‌سگا قه‌زایی رژیم له‌ شار سنه‌ بناسنێ . قابل باسه‌ ناوبریاێ تا ئێگه‌ چه‌ن جار له‌ لاێ نهاده‌یل ئه‌منیه‌تی و قه‌زایی رژیمه‌و ئێحزار بی یه‌ وه‌ وه‌سیله‌یل ئه‌یویش مسادره و زه‌بت‌ بینه‌ .

خه‌وه‌ر

گۆرووه‌یل سه‌له‌فی و رژیم ئێسلامی له‌ شار سنه‌ هه‌ده‌فه‌یل هاوبه‌شێک دێرن :

له‌ ناو خه‌وه‌ره‌یلێک که‌ له‌ شار سنه‌ ولاوه‌و بینه‌ هاتیاس : ئه‌وه‌ قه‌ێرێکه‌ گۆروه‌یل سه‌له‌فی که‌ رژیم ئێسلامی له‌ ئه‌وان پشتیوانی که‌ێ ، چالاکیه‌یل ته‌بلیغی و کوینه‌ پره‌سانه‌ێ خۆیان وه‌ر ولاوتره‌و کردیانه‌ وه‌ ده‌س وه‌ ئه‌زیه‌ت و ئازار مه‌ردم شار سنه‌ ده‌ن . خه‌وه‌ره‌یل نیشان له‌ یه‌ دیرن گۆروه‌یل سه‌له‌فی وه بم ئه‌و کار نانه‌و تیره‌نازی کردن له‌ جی یه‌یل ئۆمومی بائس فره‌تر بی ین‌ فه‌زاێ ترس و له‌رز له‌ ئه‌و شاره‌ بینه‌ وه‌ لێوا له‌ درس کردن فه‌زاێ ئه‌منیه‌تی و نێزامی له‌ شار سنه‌ وه‌ رژیم کۆمه‌ک که‌ن ، له‌ لاێ تره‌و رژیمیش دێرێ جوره‌یلێک له‌ چالاکیه‌یل ته‌بلیغی و ولاو بی ین خرافه‌یل مه‌زهه‌بی وه‌لاێ ئه‌و گۆرووه‌و پشتیوانی که‌ێ که‌ ئه‌و کار رژیمه‌ بائس نگرانی و خه‌شم مه‌ردم بی یه‌ .

خه‌وه‌ر

ده‌ر کردن به‌خشنامه‌ێ قه‌خه‌ بی ین قسیه‌ کردن وه‌ زوان دالگی له‌ مه‌دره‌سه‌یل شار سه‌قز :

وه‌ ناو خه‌وه‌ره‌یلێک که‌ له‌ شار سه‌قز وه‌ ده‌س ئیمه‌ ره‌سیاس ، هاتیود : کار وه‌ ده‌سه‌یل رژیم ئێسلامی له‌ ئێداره‌ێ ئاموزش و په‌روه‌رش شار سه‌قز وه‌گه‌رد ئه‌و ده‌یشت دان به‌یانیێک قسیه‌ کردن وه‌ زوان کوردی له‌ گشت مه‌دره‌سه‌یل ئه‌و شاره‌ قه‌ێخه‌ ئێعلام کردنه‌ . ره‌ئیس ئێداره‌ێ ئاموزش و په‌روه‌رش رژیم له‌ شارستان سه‌قز له‌ ناو به‌خشنامێک که‌ ئه‌راێ گشت مه‌دره‌سه‌یل ئه‌و شاره‌ کل کردیود ئێعلام کردیود : له‌ یه‌ ئه‌و دیوا قسیه‌ کردن وه‌ زوان کوردی له‌ گشت مه‌دره‌سه‌یل ئه‌و شاره‌ قه‌ێخه‌س وه‌ هیچ محه‌سل و معه‌لمێک حه‌ق نه‌ێرێ له‌ کلاسه‌یل ده‌رس وه‌ زوان کوردی قسیه‌ بکه‌ێ . قابل باسه‌ ئه‌و به‌خشنامه‌ وه‌گه‌رد مۆخالفت و عه‌کسۆلئه‌مه‌ل تنوتێژ معه‌لمه‌یل و محه‌سله‌یل پله‌یل جوراوجور ته‌حسیلی وه‌ شار سه‌قز ریوه‌ریو بی یه‌ .

خه‌وه‌ر

کار وه‌ ده‌سه‌یل رژیم ئێسلامی نیه‌یلن ده‌سفروشه‌یل سنه‌یی کاسبی بکه‌ن :

له‌ شار سنه‌ خه‌وه‌ر ره‌سی یه‌ : رۆژ سێسه‌مه‌ 2 ئازه‌ر مانگ نیروه‌یل ئێنتزامی رژیم وه‌ ده‌سفروشه‌یل فه‌قیر ئه‌و شاره‌ حه‌مله‌ کردنه‌ وه‌ نواێ کاسبی ئه‌وان گرتنه‌ . ماموره‌یل رژیم له‌ کوردستان له‌ حال و رۆژێک وه‌ کاسبکاره‌یل سنه‌یی حه‌مله‌ و ته‌وهین کردنه‌ که‌ جارێک هه‌م شاره‌یل کورد نشین وه‌ فه‌قیر ترین شاره‌یلن وه‌ مه‌ردم مه‌جبورن وه‌ خاتر بژی رۆژانه‌ێ خۆیان و خانواده‌یلیان له‌ ناو خیاوانه‌یل شار به‌سات ده‌سفروشی واز بکه‌ن وه‌ له‌ ئه‌و رێیه‌و نان شه‌وێک ئه‌را خۆیان وه‌ ده‌س بارن . کار وه‌ ده‌سه‌یل رژیم بێ ئه‌وه‌ که‌ وه‌ مه‌ردم بیوشن ئه‌وان ئه‌رای گۆزران خۆیان چوه‌ بایه‌ بکه‌ن له‌ هه‌ر ئه‌و کار و کاسبی ساده‌ێ ئه‌وانه‌ هه‌م نوا گرن .

خه‌وه‌ر

 

مه‌حروم مه‌نن کوردستان وه‌ راس نه‌وه‌تن سازمان بهزیستی رژیم جمهوری ئێسلامی :

له‌ حال و رۆژێک که‌ مه‌ردم کوردستان له‌ مه‌حرومیه‌ته‌یل فره‌ێ بێهداشتی ره‌نج کیشن ، سازمان بێهزیستی رژیم له‌ ئۆستان کوردستان ئێدئا کردیاس 85 له‌ سه‌د مناله‌یل ئۆستان کوردستان ماینه‌ێ چه‌و بینه‌ . مه‌ردم شار و ئاوائیه‌یل کوردستان له‌ ناو 31 سالێک که‌ له‌ حاکمیه‌ت رژیم ئێسلامی ئه‌و پشت سه‌ر نایمنه‌ وه‌ خاتر دۆچوه‌کی کردنه‌یل سیستماتیک ، وه‌گه‌رد به‌رنامه‌ و له‌ قه‌سد و سیاسی ، له‌ فرێک وه‌ عه‌رسه‌یل زنه‌ی کۆمه‌لایه‌تی ، ئێقتسادی ، فه‌رهه‌نگی ، ئاموزشی وه‌ بێهداشتی وه‌گه‌رد مه‌حرومیه‌ته‌یل تنوتێژ ریوه‌ریو بینه‌ . له‌ لاێ تره‌و وه‌ختێک که‌ دیارده‌یل خه‌ده‌مات بێهداشتی و ده‌رمانی ئه‌وه‌یش فره‌تر له‌ عه‌رسه‌ێ نواگیریه‌یل پزشکی له‌ ئۆستان کوردستان له‌ نیسبه‌ت وه‌ فرێک له‌ جی یه‌یل تر ولات ئێران تا ئێنازێک فره‌ خراوتره‌ ، سازمان بێهزیستی رژیم له‌ ئه‌و ئۆستانه‌ له‌ ناو دروێک گه‌ورا ئێدئا کردیاس : ته‌نیا 15 له‌ سه‌د مناله‌یل شار و ئاواییه‌یل کوردستان ماینه‌ێ چه‌و نه‌کریانه‌ . ئه‌و درو گه‌ورا وه‌لاێ کار وه‌ده‌سه‌یل رژیمه‌و له‌ کوردسان وه‌ وه‌ختێکه‌ که‌ ئه‌راێ نمونه‌ مه‌ردم شار دێوانده‌ره‌ وه‌ ئاواییه‌یل سه‌ر وه‌ ئه‌و شاره‌ وه‌ خاتر نیاشتن مۆته‌خه‌سس وه‌ ده‌مو ده‌سگایل سه‌ره‌تایی چه‌و پزشکی ناچارن ئه‌راێ ماینه‌ێ چه‌و مناله‌یل خۆیان ، بان ئه‌راێ شار سنه‌ .

خه‌وه‌ر

 

له‌ کارخانه‌ێ نیرو ره‌خش کوردستان ده‌سمۆزد وه‌ کارگه‌ره‌یل نیه‌ریه‌ێ :

له‌ شار سنه‌ خه‌وه‌ر ره‌سی یه‌ کارگه‌ره‌یل کارخانه‌ێ نیرو ره‌خش کوردستان له‌ مه‌نته‌قه‌ێ بهشت محه‌مه‌دی ئه‌و شاره‌ ، ئه‌وه‌ 5 مانگه‌ که‌ حه‌قوحۆقوق خۆیان نه‌گرتنه‌ . له‌ دریژه‌ێ ئه‌و خه‌وه‌ره‌ هاتیاس له‌ کارخانه‌ێ نیرو ره‌خش کوردستان که‌ سیم و ترانس به‌رق ته‌ولید که‌ێ 40 کارگه‌ر دێرن کار که‌ن وه‌ هه‌ر وه‌خت کارگه‌ره‌یل خوازیار گرتن حه‌قوحۆقوق خۆیان بینه‌ ، خاون کار ، ئه‌وان ته‌هدید وه‌ ده‌ر کردن له‌ سه‌ر کاریان کردیاس .

ته‌سادف رانه‌نده‌گی له‌ سلسله‌ سه‌ر وه‌ ئۆستان لۆرستان 3 کۆشیاێ و 12 زه‌خمی وه‌ جی هیشت :

وه‌ ناو ئه‌و ئێتفاقه‌ که‌ رۆژ چوار شه‌مه‌ ریو دا ، مینوبوسێگ که‌ 15 مسافر له‌ ناوێ بیود له‌ 2 کامیون دێد که‌ وه‌ خاتر ئه‌وه‌ ، 3 که‌س جی وه‌ جی گیانیان له‌ ده‌س ده‌نو 12 که‌س تر وه‌ تنی زه‌خمی بیون . کارناسه‌یل پۆلیس رێ ئۆستان لۆرستان ده‌لیل ئه‌و تسادفه‌ بێ ئێحتیاتی و خاوێلی راننده‌ێ مینی بوس له‌ چیین وه‌ چه‌پ ناو بردیون . وه‌ قسیه‌ێ کارناسه‌یل پۆلیس رێ ، به‌ش وه‌رچاو تسادفه‌یل راننده‌گی له‌ مێحوه‌ره‌یل ئێرتباتی ئه‌و ئۆستانه‌ وه‌ خاتر بێ ئێحتیاتی و خاوێلی راننده‌یل له‌ رئایه‌ت نه‌کردن سرعه‌ت قانونی ، چیین ئه‌راێ حه‌ریم مه‌سیر ریوه‌ریو ، گویه‌رانن مه‌سیره‌یل راننده‌گی و ژێر بان بی ین ماشین وه‌ زه‌عف له‌ کۆنترۆل نه‌کردن ماشین وه‌ خاتر سۆرئه‌ت فره‌ ریو ده‌ن . هه‌فته‌ێ لێیه‌وه‌ریش ریو دان 3 ته‌سادف تر له‌ مێحوه‌ره‌یل ئێرتباتی ناو و ده‌یشت شاری ئۆستان لۆرستان بائس کۆشیان 4 که‌س تر بی . کار وه‌ده‌سه‌یل پۆلیس رێ ئۆستان لۆرستان وه‌ مه‌ورده‌یلێک ئێشاره‌ کردیون که‌ بێ گۆمان راسه‌ ، وه‌لی ته‌سادفه‌یل راننده‌گی له‌ ناو ولات ئێران بێ گۆمان ده‌لیله‌یل تر دێرێ که‌ کار وه‌ده‌سه‌یل رژیم له‌ وه‌تن ئه‌وانه‌ خۆیان پیه‌رزنن ، له‌ ئه‌وانه‌ گه‌نی و غه‌ێر ئێستاندارد بی ین رێیه‌ل و جاده‌یل ئێرانه‌ وه‌ ئه‌وه‌یش فره‌تر شاره‌یل کورد نشین خوه‌رهه‌لات کوردستان‌ ، له‌ ده‌لیله‌یل تر ته‌سادفه‌یل ، سه‌ختگیری نه‌کردن پۆلیس راهنمایی و راننده‌گی له‌ ئێمتحان گرتنه‌ که‌ وه‌ ره‌حه‌تی هه‌ر که‌س له‌ ئه‌و ولاته‌ بوده‌ خاون گواهینامه‌ وه‌ له‌ پشت فه‌رمان نیشی وه‌ له‌ ریو دان ته‌سادفه‌یل راننده‌گی نه‌قش وه‌رچاوێک وازی که‌ێ .

خه‌وه‌ر

خراو تر بی ین حال و رۆژ محه‌مه‌د سدیق که‌بودوه‌ند :

ئیوشیه‌ێ حال و رۆژ جسمانی محه‌مه‌د سدیق که‌بودوه‌ند ، مدافه‌ێ حۆقوق به‌شه‌ر له‌ زندان فره‌ خراو و خه‌ته‌رناکه‌ . راپۆرت ولاو بی له‌ باره‌ێ محه‌مه‌د سدیق که‌بودوه‌ند نیشان له‌ یه‌ دێرێ ئه‌و مدافه‌ێ حۆقوق به‌شه‌ره‌ ئه‌راێ جار دێم له‌ ناو 2 مانگ لێیه‌وه‌ر وه‌ خاتر فشار مه‌غزی و عه‌سه‌بی له‌ هوش خۆێ چی یه‌ . یه‌ وه‌ وه‌ختێک که‌ که‌ کار وه‌ده‌سه‌یل رژیم له‌ زندان نه‌ ته‌نیا نیه‌یلن ئه‌یو دار و ده‌رمان بکریه‌ێ به‌لکه‌ وه‌گه‌ردێ رێیو ره‌وه‌ن گه‌ن و توهین وه‌ ئه‌زاو ئه‌یو ئێزافه‌ که‌ن . محه‌مه‌د سدیق که‌بودوه‌ند وه‌ جرم دامه‌زرانن سازمان ده‌فا له‌ حۆقوق به‌شه‌ر کوردستان محاکمه‌ و وه‌ 11 سال زندان مه‌حکوم کریاس . ئه‌یو له‌ حال حازر له‌ به‌ند 350 زندان ئێوین وه‌ سه‌ر به‌ێ .

خه‌وه‌ر

قه‌راره‌ وێ زیو ده‌س چه‌ن که‌س له‌ ناو شار کرماشان بوریه‌ێ :

خه‌وه‌ر ره‌سنی حۆکومه‌تی ئیسنا له‌ زوانی کار وه‌ده‌سه‌یل ده‌سگا قه‌زایی رژیم وه‌ ئه‌و باره‌ خه‌وه‌ر دایود : تا چه‌ن رۆژ تر چه‌ن حۆکم وه‌حشیانه‌ێ تر برین ده‌س وه‌ ناو شار کرماشان له‌ وه‌ر چه‌و مه‌ردمه‌و وه‌ ئێجرا نریه‌ێ . برین ده‌س وه‌ مجازاته‌یلێکه‌ که‌ له‌ ناو ئایین ئێسلام وه‌ پێ ئێشاره‌ بی یه‌ وه‌ کار وه‌ده‌سه‌یل قه‌زایی رژیم جمهوری ئێسلامی ئه‌و کاره‌ وه‌ بان قانونه‌یل ئێسلامی و شه‌رعی لازم زانن وه‌ هه‌ر چه‌ن جارێک له‌ وه‌ر چه‌و مه‌ردم وه‌ ناو خیاوانه‌یل شاره‌یل ئێران ئه‌و حۆکم نائێنسانی یه‌ وه‌ ئێجرا نه‌ن . حۆکم برین ده‌س فره‌تر له‌ مه‌ورد که‌سه‌یلێک وه‌ ئێجرا نریه‌ێ که‌ دزی و ده‌خه‌لی که‌ن .