هیلاری کلینتون ئیوشێ ئێران دێرێ بودن وه یهێ دیکتاتوری نێزامی :
هیلاری کلینتون ، وهزیر ئۆمور دهرهوهێ ئێمریکا ئێعتقاد دێرێ که حۆکومهت ئێران دێرێ وهرهولاێ یهێ دیکتاتوری نێزامی چود وه مهردم ئێران یهواش یهواش له نواێ ئێتفاقهیل گهن و ناراحهت کهرێک که وه ناو ئهو ولاته دێرێ کهفێ ئهکسۆلئهمهل نیشان دهن .دهمهتهقهێ مامۆستا شێخ ئزۆدین حۆسهینی وهگهردێ بی بی سی :
وه ناو ههفتهیل لێیهوهر تلویزیون بی بی سی فارسی وهگهردێ مامۆستا شێخ ئزۆدین حۆسهینی دهمهتهقهێک داشت که مامۆستا شێخ ئزۆدین وه شێوهێ دهقیق و ئۆسولی و مۆنسفانه وه عنایهت فانی مۆجری بهرنامهێ به عبارت دیگر جواو دا که لێره مه ههول دامه بهشهیلێک ئهراێ ئێوه ئهزیزهیل بینهر که له ناو کوردستان رۆژههلات زنهی کهین وه شایهد وه خاتر مۆشکلهیل ئینترنتی نهتیوهنین ئهوه دهمهتهقه بیونین ئاماده کردمه که تهقدیم ئێوه ئهزیزهیل بود .راپۆرت پرس و جور کهر ویژهێ سازمان ملهتهیل یهکگر وه بارهێ کوردهیل سوریه :
ئۆلیویهێ دۆشوتێ ، پرس و جور کهر ویژهێ سازمان ملهتهیل یهکگر دیواێ پرس و جور له سوریه ، وه ناو راپۆرتێك حال و رۆژ کوردهیل ئهو ولاته فره خراو وه حساو هاوردیود . ئهیو وه ناو ئهو راپۆرته ئێشاره کردیاس 300 هزار کهس وه کوردهیل ساکن سوریه ملیهت نهێرن ، یانێ دهولهت سوریه له داین تابعیهت وه ئهوان نوا گرێ وه ئهو 300 هزار کهسه تابعیهت ولات تر ههم نهێرن . پرس و جور کهر ویژهێ سازمان ملهتهیل یهکگر وهتیاس : ئهو 300 هزار کورده له حهق و حۆقوق شاروهندی مهحرومن وه حهق داشتن زهیو و زار ، دهرس خوهنین بێ پیول ، ئێستفاده له خهدهمات بێهداشت ئۆمومی ، داشتن گۆزهرنامه ئهراێ سهفهر کردن ئهو دهیشت وه سوریه ، ئێستخدام وه بهشهیل دهولهتی وه ئۆمومی وه ئهوان گریاس .
سهرکۆت تهزاهرات و رێپهێمایی کوردهیل تۆرکیه :
رۆژ جۆمعه 19 شاریوهرمانگ ، پۆلیس تۆرکیه دهس وه سهرکۆت تهزاهۆرات سهدهیل کورد مۆئتهرز وه ناوراس شار ئێستانبول دا وه شمارێک ههم دهسگیر کرد . ئهو تهزاهراته وه وهخت نزیک بی ین وه رفراندوم له بارهێ درس کردن قانون ئهساسی ئهو ولاته ، وه داوهت یهکێک وه حێزبهیل سیاسی کورد وه مهێدان تهقسیم ئێستانبول ئهوپا بی . نمایهندهیل کهسهیل تهزاهۆرات کهر وه ناو ئهو ئێعتراز خۆیانه بهیانیێک خوهنسن که له ناو ئهوه فشارهیل و دۆچهوهکی کردنهیل رژیم تۆرکیه وه زد کوردهیل مهحکوم بیود .
مل کهجی کردن له داین بههاێ گهنم ئهرواوهیل بوکانی :
وه ناو خهوهرهیلێک که له شار بوکان وه دهس ئیمه رهسیاس ، هاتیاس : وه گۆزهریان نزیک 3 مانگ ، شرکهت تعاونی شار بوکان له داین بههاێ گهنم سهنیاێ وه ئهرواوهیل ئابادیهیل سهر وه ئهو شاره نوا گرێ . کار وه دهسهیل رژیم له شرکهت تعاونی ئهو شاره وه یه که نزیک 3 مانگ لێیهوهر ، گهنم فرهتر له 100 ئهرواو تهحویل گرتنه وهلی جارێک ههم له داین بههاێ ئهوه وه ئهرواوهیل زهحمهتکش مهنتهقه نوا گرن . ئهو مهسئهله له کنار کهم بی ین ئهرواوی ، بی ین ئافات گیاهی وه کهمی ئاو وه ناو سال ئێمسال ، ئهرواوهیل مهنتهقه وهگهردێ مشکلهیل چهن بهرابهرێک ریووهریو کردیاس .
مۆلاقات وهگهردێ خانوادهێ کهسهیل له دار دریاێ وه ناو تاریخ 19 ئۆردیبهشت :
شمارێک وه مهردم شارهیل کوردستان وهگهردێ خانوادهیل فهرزاد کهمانگهر ، فهرهاد وهکیلی ، ئهلی حهیدهریان وه شیرین ئهلهم هولی که وه ناو تاریخ 19 ئۆردیبهشت ئێعدام بین مۆلاقات کردن . وه ئهو بهرنامه که وه مالهیل فهرزاد کهمانگهر ، فهرهاد وهکیلی وه ئهلی حهیدهریان ئهوپا بی ، شمارێک وه چالاکهیل مهدهنی و سیاسی کوردستان وه خانوادهێ زندانیهیل سیاسی وه گیان له دهس داگهیل کوردستان حۆزور داشتن . دایه سهلتهنه دالگ فهرزاد کهمانگهر دیواێ مۆلاقات وهگهردێ چالاکهیل مهدهنی و سیاسی له مالهکهێ خۆێ وه شار کامیاران ، وهگهردێ ئهوان ئهراێ مۆلاقات وهگهردێ خانوادهێ ئهلی حهیدهریان وه فهرهاد وهکیلی ئهراێ شار سنه چی . خهوهرهیل نیشان وه یه دێرن که وه شار ماکو ههم مهراسم هاودهردی وهگهردێ خانوادهێ شیرین ئهلهم هۆلی ئهوپا بی یه . فهرزاد کهمانگهر ، ئهلی حهیدهریان ، شیرین ئهلهم هۆلی ، فهرهاد وهکیلی له کوردستان وه مێهدی ئێسلامیان خهلک شار شیراز وه ناو تاریخ 19 ئۆردیبهشت مانگ ئێمسال وه زندان ئێوین تێران له دار دریان که ئێعتراز مهردم کوردستان وه دیواێ خۆێ یهو داشت .
وه دوواره خهوهرێک تر وه بارهێ ئێعتسابهیل کارگهری وه شار سنه :
دهس له کار کیشان کارگهرهیل شرکهت پهرهون تهرح سنه :
ئهنجۆمهن کارگهرهیل بهرق و فلزکار کرماشان وه ناو راپۆرتێک خهوهر دایود ، رۆژ یهێشهمه 14 شاریوهرمانگ 30 کهس وه کارگهرهیل شرکهت پهرهون تهرح وه پهیمانکارهیل نیروگا سیکل تهرکیبی سنه دهس له کار کیشانه . کارگهرهیل شیفت رۆژ و شیفت شهو قالب گیر و ئارماتور بهند شرکهت پهرهون تهرح وهگهردێ هاوئاههنگی زیوتر له ئێعتراز وه نهگرتن 5 مانگ دهسمۆزد ئهودیواکهفتیاێ خۆیان دهس له کار کیشایون وه خوازیار گرتن حهق و حۆقوق ئهودیواێ کهفتیاێ خۆیان بیون . قابل باسه خاون کار که وهگهردێ جدی بی ین گارگهرهیل ئهراێ گرتن حهق و حۆقوقهیل خۆیان ریووهریو بیود ، له سهر ناچاری مهجبور وه داین گشت حهق و حۆقوق کارگهرهیل بیود . وه دریژهێ ئهو راپۆرته هاتیود : رۆژ دۆشهمه 15 شاریوهرمانگ ههم 30 کهس وه کارگهرهیل جوشکار و بتون رشن ئهو شرکهته ههم له ئێعتراز وه نهگرتن 4 تا 6 مانگ دهسمۆزدهیل ئهودیواکهفتیاگیان دهس له کار کیشایون که وهگهردێ تههدید خاون کار وه حهراسهت نیروگا سیکل تهرکیبی سنه ریووهریو بیون .
دهس له کار کیشان کارگهرهیل شرکهت پارسیان سنه :
رۆژ سێشهمه 16 شاریوهر مانگ 40 کهس وه کارگهرهیل شرکهت پارسیان وه پهیمانکارهیل نیروگا سنه له ئێعتراز وه نهێریان دهسمۆزدهیل ئهو دیواێ کهفتیاێ 5 مانگهێ خۆیان دهس وه ئێعتساب دان . وه ناو راپۆرتێک که وه شار سنه ئهو دهیشت دریاس هاتیاس : خاون کار وه کارگهرهیل پێشنهاد داس که وه ههر کهس 20 هزار تمهن ئهلهل حساو دهێ وهلی ئهوان قهبول نهکردنه وه ئهوان وهتیون ئهگهر حهق و حۆقوقیان وه ئهوان نهێریهێ ، دوواره دهس له کار کیشن .
دهرگیری مهردم وهگهردێ نیروهیل رژیم وه شار بانه :
وه شار بانه خهوهر رهسی یه ، ئێوارهێ رۆژ پهنجشهمه 18 شاریوهر مانگ مهردم وهگهردێ نیروهیل ئێنتزامی و ئهمنیهتی رژیم وه ئهو شاره دهرگیر بینه . له دریژهێ ئهو خهوهره هاتیاس ، دیواێ ئهوه که مهردم وه خیاوانهیل ئهو شاره وه ئهلخۆسوس خیاوان بیمارستان کووهو بین ، نیروهیل رژیم ئهراێ تهرف و تیون کردن ئهوان دهس وه زور وهتن دایون که له جواو ئهو کار رژیمه مهردم مۆئتهرز وه زد ئهوان دهس وه مقاومهت دان ، که لێ ناوه چهن کهس وه لاێ نیروهیل رژیمهو دهسگیر بین .
دهسگیری یهێ شائر و مۆتهرجم وه شار مهریوان :
رۆژ سێشهمه 16 شاریوهر ئهزیز ناسری شائر و مۆتهرجم مهریوانی وهلاێ نیروهیل ئهمنیهتی ئهو شارهو دهسگیر وه ئهراێ زندان ئێتلائات شار سنه کێل کریا . قابل باسه جارێک هیچ خهوهرێک له بارهێ دهلیل دهسگیری کهس ناوبریاێ له دهس نی یه . چهنێک لێیهوهر ههم مۆختار هۆشمهند وه بێهزاد کوردستانی وه چالاکهیل ئهدهبی و فهرههنگی ئهو شاره ، وهلاێ نیروهیل ئهمنیهتی رژیم ئێسلامییهو دهسگیر بیون . ئهزیز ناسری وه ناو سالهیل لێیهوهر بێجله له چاپ دان چهن مهجموئه شعر له خۆێ چهن ئهسهر ئهدهبی له شائرهیل کورد وه زوان فارسی تهرجۆمه کردیاس .
حهملهێ نیروهیل رژیم وه مهراسم پرسه و سهر خۆشی یهکێک وه پێشمهرگهیل شههید بی وه شار سنه :
رۆژ سێشهمه 16 شاریوهر مانگ مهئمورهیل ئهمنیهتی رژیم جمهوری ئێسلامی وه مهراسم پرسه و سهر خۆشی ئهفشین ئهسلانی یهکێک وه پێشمهرگهیل شههید بی کۆمهله وه شار سنه حهمله کردیون وه نواێ ئهوپا بی ین ئهو مهراسمه گرتیون . خهوهرهیل رهسیاێ وه شار سنه نیشان وه یه دێرن که مهئمورهیل رژیم بێجله له یهک دان ئهو مهراسمه وه نوا گرتن له هاتن قهوم و کهس و کار ئهفشین ئهسلانی ، خانوادهگهێ ئهیو تههدید کردیون ئهگهر ئهراێ کۆرهکهیان مهراسم بگرن وهگهردێ ئهوان بهرخۆرد بود . قابل باسه وه ناو ههفتهێ گۆزهریاێ 4 پێشمهرگهێ کۆمهلهێ زهحمهتکشان کوردستان وه ناوهیل سهئدی سنه ، ئازاد کامیاران ، ئهمجهد شیرزادی وه ئهفشین ئهسلانی ناسیاێ وه زاگۆرۆس کهفتنه کهمین نیروهیل ئێتلائاتی و مۆزدور جمهوری ئێسلامی یهو که وه داخهوه ههر چواریان شههید بین .
گیان له دهس دان 2 کهس وه خاتر تهقین مین له شار دیواندهره :
رۆژ شهمه 13 شاریوهرمانگ 2 کهس وه ناوهیل ئاکام و کورش مۆرادی وه شار دیواندهره وه خاتر تهقین مین وه جی مهنیاێ له پایگایل رژیم وه داخهوه گیان خۆیان وه دهس دان . ئهو مینه وهختێک تهقیود که چهن نهوجهوان دیواێ پیا کردن ئهوه له مهنتهقێک وه ناو شههرهک پاسداران که زیوتر نێزامی بیود ، وه شار دیواندهره سهرگهرم وازی وهگهردێ ئهوه بیون . وه ناو ئهو ئێتفاقه چهن کهس تر ههم زهخمی بیون .
تون بی ین فهزاێ ئهمنیهتی حاکم وه شار سنه :
وه بان خهوهرهیل رهسیاێ وه شار سنه هاتیاس ، نیروهیل ئێتلائاتی و ئهمنیهتی رژیم ئێسلامی ئێوارهێ رۆژ سێشهمه 16 شاریوهرمانگ وهگهردێ بهسان خیاوان 6 بههمهن ، خیال درس کردن فهزاێ ترس و وهحشهت داشتنه . نیروهیل رژیم وه خیاوان 6 بههمهن وهگهردێ درس کردن مزاحمهت ئهراێ مهردم ، دهس وه نوا گرتن ماشینهیل ، وشکانن و پرس و جور له سهر نشینهیل ماشینهیل و کهسهیلێک که وه ناو خیاوانهیل بیون دایون . قابل باسه وه خاتر مۆزاحمهت درس کردن نیروهیل ئهمنیهتی رژیم ، جهوانهیل دهس وه مقاومهت دایون که وه خاتر ئهوه جهوانێک وهلاێ نیروهیل ئهمنیهتی رژیمهو وه تنی زهرب و شهتم وه دیواتر ههم دهسگیر وه ئهراێ زندان کێل کریهێ .
کووهو بی ین ئێعترازی کارگهرهیل شرکهت کرپ ناز کرماشان :
رۆژ چوارشهمه 17 شاریوهر مانگ شمارێک وه کارگهرهیل شرکهت کرپ ناز وهگهردێ کووهو بی ین وه نواێ ساختمان مۆدیریهت شۆئبهیل بانک ملهت وه ناو شار کرماشان خوازیار گرتن دهسمۆزدهیل ئهو دیوا کهفتیاێ وه حهق بیمهێ خۆیان بین . ئهو کارگهرهیله وهگهردێ له دهس داشتن پلاکاردهیلێک خوازیار رهسیدهگی وه مۆشکلهیل خۆیان جور دریان کامل دهسمۆزدهیل و بیمهێ خۆیان وه نوا گرتن له تهئتیلی ئهو واحد تهولیدی یه بیون . کارگهرهیل شرکهت کرپ ناز کرماشان چهنێک لێیهوهر ههم وهگهردێ کووهو بی ین وه نواێ ئۆستانداری خوازیار رهسیدهگی وه مشکلهیل خۆیان بیون .
وه کارگهرهیل ماشین سازی بروجرد ، دهسمۆزدهیل ئهو دیوا کهفتیاگیان نیهریهێ :
خاون کار کارخانهێ ماشین سازی بروجرد له داین دهسمۆزدهیل و حهق و حۆقوقهیل ئهو دیواێ کهفتیاێ کارگهرهیل ئهو کارخانه نوا گرێ . قابل باسه کارگهرهیل کارخانهێ ماشین سازی بروجرد جارێک ههم وه گرتن 4 مانگ دهستمۆزد ، 2 مانگ بۆن کارگهری وه ههمیش پاداش مهربوت وه ئهێد نهورۆز پارهکه مهحروم مهننه .
خۆدکۆشی 3 ژن جهوان وه ئۆستان ئیلام :
وه ناو ههفتهێ گۆزهریاێ 3 دیوهت وه ناو یهێ رۆژ وه ئۆستان ئیلام دهس وه خۆدکۆشی دایون که وه داخهوه یهکێک وه ئهوان گیان خۆێ وه دهس دا . وه ناو راپۆرتێک که وه ئهو باره ولاوهو بیود هاتیاس : 3 ژن جهوان 17 و 18 ساله وه شارهیل ئیلام ، ئهیوان وه دهرهشار دهس وه خۆدکۆشی دانه که یهکێک وه ئهوان گیان خۆێ وه دهس دایود وه حال ئهو دووانهکه ههم خراو گۆزارش بی یه . ئۆستان ئیلام فرهترین ئامار خۆدکۆشی وه ئهلخۆسوس خۆدسوزی ژنهیل و دیوهتهیل له ناو ولات ئێران دێرێ . دیواێ ئۆستان ئیلام ئۆستانهیل کرماشان و لۆرستان وه داخهوه مقامهیل دێم و سێم دێرن . میزان بێکاری بان ، نهیون کار و شۆغل و دهرامهد وه یهئس و نائۆمیدی له ئایهندهێ نادیار و ناروشن بائس خۆدکوشی مهردم ئۆستانهیل ناوبریاێ وه فرهتر جهوانهیل بود .تهقین مین وه قهسر شیرین بائس کۆشیان یهێ نهفهر وه زهخمی بی ین 4 کهس تر بی :
تهقین مین وه شارهیل مهرزی کورد نشین جارێک ههم وه داخهوه ههر دێرێ قۆربانی گرێ وه کهس نیهزانێ تا کێ بایه مین ئێ سهبازهیل خهفتیاگه ههر بائس کۆشتن و لهت لهت کردن مهردم بێ گۆنا شارهیل مهرزی بود . ئێ جاره مین بائس کۆشیان و زهخمی بی ین 5 کهس وه گۆرو تهخریب مین بی یه کهسهیلێک که وه حال پیا کردن و خۆنسا کردن مینهیل بیون . جدی نهیون کار وه دهسهیل رژیم جمهوری ئێسلامی له سهنن دهسگایل مۆدرن خۆنسا کهر مین بائس بی یه وه یه که 21 و 22 ساله له شهر ئێران و عهراق ئهو پشت سهر نهیمن جارێک ههم مینهیل کالیاێ وه شارهیل هاو مهرز وهگهردێ ولات ئهراق جور کرماشان و ئیلام قۆربانی بگرن که ئێ جاره وه داخهوه بائس کۆشیان یهێ کهس وه زهخمی بی ین 4 کهس تر وه کهسهیلێک بی که مهشغول خۆنسا کردن ئهو مینهیله بیون .
کاک سدیق کهمانگهر :
کاک سدیق کهمانگهر سال 1325 له ئابادی ئافهریان سهر وه شار کامیاران چاوێ وه دنیا واز کهی. دهورهێ ئێبتدایی تهحسیلاتی خۆی وه شارهیل قۆروه و سۆنقور کۆلیایی ئهو پشت سهر نهێ وه دیواتر ههم خانوادهێ کاک سدیق کهمانگهر کۆچ کهن ئهراێ شار کرماشان وه دهورهێ دهبیرستان ههم وه ئهو شاره ئهو پشت سهر نهێ .بهشهیلێک له زنهی نامهێ کاک فوئاد مۆستهفا سۆلتانی :
کاک فۆئاد مۆستهفا سۆلتانی سال 1327 له ئابادی ئالمانه سهر وه شار مهریوان چاوێ وه دنیا واز کرد . کاک فۆئاد سال 1346 وارد دانشگا سهنعهتی شهریف بی وه دیواێ ئهو پشت سهر نان مهرحهلهیل تهحسیلی مووهفهق وه گرتن مۆههندسی ئێلێکترونیک بی . کاک فۆئاد ههر له ناو ئهو دانشگا وه له حهێن جهوانی کار و چالاکیهیل سیاسی خۆێ شروو کرد .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .