راپۆرت
ئهحمهد خاتمی جورێک قسیه کرد که ئێنگار رسانهیل دهرهکی بێکارن وه کار و کاسبی نهێرن وه تهنیا وه زد قانون ههدهفمهند کردن سوبسیدهیل له ئێران چشت ئیوشن و نیوسن . ئهیو که ئێمام جمعهێ مووهقهت تێرانه ، رۆژ جمعه 14 ئابانمانگ وه ئێشاره وه تهرح ههدهفمهند کردن سوبسیدهیل که مهرحهلهیل ئاخر ئهوه له ئێران دێرێ وه ئێجرا نریهێ وهت : 170سایت دهرهکی وه زد ئهو قانونه کار کهن تا ناو دل مهردم خالی بکهن . ئهیو وه خۆێ زامهت نیا بیوشێ یه گرانی و تهوهرۆم و گهن کاریهیل ئێقتسادی رژیمه که مهردم نائۆمێد کردیاس وه هانه فکر یه که چیون بتیوهنن نان شهو خۆیانو منالیان وه دهس بارن . خاتمی له ناو نماز جمعه شار تێران وه نهقل له خامنهیی ، رێبهر جمهوری ئێسلامی ، ئلهت موزه گرتن دژمنهیل وه قسیهێ خۆێ له نواێ ئێجراێ تهرح ههدهفمهند کردن یا له ناو بردن سوبسیدهیل یه زانس که ئێ تهرحه وه زهرهر ئهوانه . ههر چهن ئهیو نهوهت ئهگهر ئهو تهرحه ئێجرا بود یا نه چه زهرهرێک وه حال دژمنهیل دهرهوه دێرێ . ئهیو وهت : له ناو 3 سال لێیهوهر شنهفتیمنه که ئێقتساد ئێران ئێ جوره و ئهو جوره بود وهلی وه لۆتف خۆدا ، له هیچ مهیدانێک ئێران بۆهرانییهو نهیوه . ئهلبهت خاتمی راس ئیوشێ ئهراێ ئهیو و خانوادهگهێ که پیول مفت وه پیان دریهێ هیچ فرقێک نهکردیاس . قانون ههدهفمهند کردن سوبسیدهیل قهرار بی له سهرهتاێ کۆت دێم ئێمسالهو له ئێران وه شێوهێ کامل وه ئێجرا بنێریهی ، وهلی وه تازگی مهحمود ئهحمهدی نژاد ، رهئیس جمهوری رژیم وهت : دهولهت ئهراێ کۆنترول کردن بازار ، وهخت دهقیق دهس وه کار ئێجراێ ئێ قانونه دیاری نیهکهێ وه خهوهرێ وه بارهێ ئهوه ولاوهو نیهکهێ . له ناو 2 مانگ لێیهوهر ، کار وهدهسهیل دهولهتی ، ئهمنیهتی وه نێزامی جمهوری ئێسلامی ، فره جار دهس وه رخ بردن مهردم دایون وه له بهرخۆرد وهگهردێ کهسهیلێک خهوهر دایون که بتوان جورهیلێک له پروسهێ ئێجراێ ئهو قانونه نوا بێرن وه ههر وه ئێ جوره کهسهیل مۆعتهرز ئهو تهرحهیشه نێسبهت وه فره بی ین ئێحتمالی قهیمهتهیل هۆشدار دایون . مۆخالفهیل دهولهت وه شمارێک له کارناسهیل ئێقتسادی وه شێوهێ وه ئێجرا نریان قانون ههدهفمهند کردن سوبسیدهیل وهلاێ دهولهتهو وه هاووهختی ئهوه وهگهردێ تن بی ین تهحریمهیل جهانی وه زد ئێران ئێشاره کهن وه ئیوشن وه ئێجرا دهر هاتن ئهو قانونه ئاخر و ئاقبهت بهراورد نێریاێ وه نارزایتی ئۆمومی هاوه شونێیهو .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .