راپۆرت
ئێ پێشنهاد سناتور جمهوری خواز ئێمریکایی یه شایهد ئهراێ باراک ئۆباما که حێزبهکهێ له ناو ههلوژاننهیل ناوێن دهورهیی مهجلس ئێمریکا شکهست خوارد ، نیشانهیلێک ههم له تههدید وه ههم له هاوکاری وهگهردێ خۆێ داشتود . تههدید وه ئێ مهعنی یه که ئهگهر باراک ئۆباما وه خوازیارهیل ئهوان ئهمهل نهکهێ تیوهنن له هاوکاری کردن وهگهردێ ئهیو کهمهو بکهن وه هاوکاری وه ئێ مهعنی یه که ئهگهر ئهیو وه خوازیارهیل ئهوان ئهمهل بکهێ ، بێ گۆمان تیوهنێ ئۆمێد فرهترێک وه هاوکاری جمهوری خوازهیل داشتود . لیندسی گراهام ، سناتور ئیالهت کارولیناێ جنوبی پێرهکه شهمه له ناو نیشتن ئهمنیهت ناوملهتهیل هالیفێکس له ولات کانادا وهت : ئێمریکا هیچ وهخت خوازیار شهر نی یه ، وهلی دنیا نیهتواێ یهێ ئێران مۆسهلهح وه سلاح ئهتۆمی قهبوول بکهێ . گراهام وهت : بهرنامهێ ئهتۆمی جمهوری ئێسلامی وه نقتێک رهسی یه که دی نیهود ئهوه وهگهردێ یهێ حهملهێ مهحدود و دیاری کریاێ له بهێن برد وه دریژه وه قسیهیلێ دا : حهتا شایهد وه ئهو نقته رهد کردیومن . ئهیو وهت : فکر کهم وه جیێک رهسیمنه که مهجبوریم وه جی حهملهێ مهحدود وه دیاری کریاێ وه ژێر ساختهیل ههستهیی رژیم جمهوری ئێسلامی ، تهوانایی ئهو رژیمه ئهراێ دهس وه کار شهرێک وه زد ئیمه و هاوپهیمانهیلمان له بهێن بهوهیم . یه سناریو نێزامی جوراوجورێکه ، ئهیو وهت : ئێ جوره حهملهێک زهمینی نی یه ، وهلی بێ گۆمان تهوانایی رژیم ئهراێ حهملهێ ورایوهر له بهێن بهێ . گراهام که خۆێ له نیرو ههوایی ئێمریکا خزمهت کردیاس ، ههدهف له حهملهێ ئێحتمالی که له بارهێ قسیه کرد ، ژێر ئاو کردن کشتیهیل جهنگی ، له بهێن بردن نیرو ههوایی وه داین زهربێک کاری وه سپا پاسدارهیل زانس . ئهیو وهت : جواو جمهوری ئێسلامی وه ئهو جوره حهملێک ، ئێحتمال دێرێ حهملهیل غهێر نهناسیاێ وه نیروهیل ئێمریکایی له ئهفغانستان وه حهملهیل تروریستی له جی یهیل تر دنیا بود . گراهام وهت : ئێمریکا بایه له ناو ئێ حال و رۆژه وه دهس کهفتن جمهوری ئێسلامی وه سلاح ئهتۆمی وه تهعسیرێک که ئهو کاره تیوهنێ وه بان ئایهندهێ دنیا بنهێ ، یهکێک ههلوهژنێ . ئهیو وهت : ئهگهر کار وه دهسهیل رژیم ئێران باوهر نهکهن که ئیمه له نیرو نێزامی ئێستفاده کهیم ، وه ئهگهر فکر بکهن ئێ جوره چشتێک ئێحتمال نهێرێ ، له ئهو سورهته گۆمان نیهکهم بتیوهنیم وهگهردێ تهحریم چشتێک بهگویهرنیم . گراهام ههمیش وهت : جارێک بایه وه تهحریمهیل جهانی فرسهت دا تا تهعسیرهیل خۆیان بنهن ، ههر چهن وه باوهر ئهیو تهحریمهیل ئێگه فلهج کهر نی ین . مۆتهکی وهزیر ئۆمور دهرهوهێ رژیم جمهوری ئێسلامی له نواێ ئێ قسیهیل سناتور گراهامه وهتیود : ئهیو له بارهێ ئێحتمال شهر ئێمریکا وهگهردێ ئێران شوخی کردیاس ، مشکل ملهت ئێران یهسه که کار وهدهسهیل رژیم جمهوری ئێسلامی گشت چشت له ئێ دنیا وه شوخی گرن . سناتور مارک ئهودال ، ئهندام دموکرات مهجلس سناێ ئێمریکایش که له پنلی مۆشتهرک وهگهردێ گراهام له نیشتن هالیفێکس حۆزور دشت ، خوازیار دریژهێ تهحریمهیل وه زد رژیم ئێران بی ، وهلی ئهیو ههم وهت : گشت رێحهلهیل قابل پرس و جور کردنن . ئیهود باراک ، وهزیر دهفا ئێسرائیلیش که له ناو ئهو نیشتنه بی وهگهردێ ئێشاره وه دریژه داشتن دهمهتهقهیل وه ناو ئێران و قۆدرهتهیل جهانی له بارهێ نهتیجه داشتن ئهو پروسه ، شهک و گۆمان خۆێ نیشان دا وه وهت : جمهوری ئێسلامی تههدید وهرچاوێک ئهراێ ههر جوره نهزمێک که له دنیا وجود دێرێ وه حساو چود . کار وهدهسهیل جمهوری ئێسلامیش فره جار وه نواێ تههدیدهیل ئێسرائیل و ئێمریکا ئهکسۆلئهمهل نیشان دانه وه ئێدئا کردنه و کهن وه ههر جوره حهملهێ نێزامی وه زد ئێران جواو فوری و قاته دهن وه جواو ئهوان وه مهرزهیل ئهو ولاته یا مهنتهقه مهحدود نیهودن . جمهوری ئێسلامی ههمیشه تواسیه وه تواێ له نفوز خۆێ وه ناو ولاتهیلێک جور ئهفقانستان و عهراق وه زد نیروهیل ئێمریکایی حساو بکهێ ، کار وهدهسهیل رژیم جمهوری ئێسلامی ئیوشن له سورهت حهملهێ ئێمریکا یا ئێسرائیل وه نیروگایل ئهتۆمی ئێران ، مهنتهقه ئهراێ نیروهیل نێزامی ئێمریکا نائهمن کهن . ههر وهێ خاتره ئهوان فره جار دهس وه مانورهیل نێزامی دهن وه له ئهو رهێیهو پیولهیل فرێک خهرج کهن . له ناو چهن ههفتهێ لێیهوهر تهقینهوهێک له پادگان ئێمام عهلی سپا بائس کۆشیان نزیک 100 کهس وه تهقین چشتێک نزیک له سهدا 60 نیرو موشهکی جمهوری ئێسلامی بی . دیواێ ئهو تهقینهوه فرێک له فهرماندهیل سپا نگرانی خۆیان نیشان دان وه وهتیان ئهوان وهختێک له ناو دل ئێران ئێ جوره زهربهیلێک خوهن چیون توان وهگهردێ نیرو دژمن له دهرهوهێ ئێران شهر بکهن . بێجله یا نه فهرماندهیل نێزامی سپا خاس زانن که تهوان نیرو ههوایی جمهوری ئێسلامی هیچ وهخت نیهتیوهنێ وه نواێ نیرو ههوایی ئێسرائیل و ئێمریکا که پێش کهفتیاێ ترین تیارهیل و موشکهیل و زد ههوائیهیل له خزمهت دێرن خۆێ بگرێ . وه شایهد کار وه دهسهیل رژیم ئێدئاێ سهدام حسهێن وهرجله شهر که فکر کرد له ناو بهغداوه تیونێ وه نواێ ئێمریکا بوسێ وه وه سهر سهدام چوه هات له هیوریانه چیود که وه فکر شاخ و شانه کیشان وه نواێ ئێمریکا و هاوپهیمانهیل ئهو ولاته بون .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .