راپۆرت
له ناو ئهو رۆژه مامورهیل نیرو ئێنتزامی رژیم وهگهرد رشیان له ناو مال فرێک له مهردم مهحهلهیل چوار دیواری حاجی ئاوا وه چوار رێیان حاجی ئاوا ، وه وه نیهت یه که له ناو مهردم ترس و وهحشهت درس بکهن دهس وه وشکانن مال مهردم دایون که وه خاتر مقاومهت و دهرگیری مهردم له مهحهلهیل ناوبریاێ ، مامورهیل نیرو ئێنتزامی مهجبور بیون ئهو مهحهلهیله وه جی بیلن . جاران ئێستفاده کردن مهردم ئهوهیش فرهتر مهردم کوردستان له ماهواره وه خاتر سهخت گیری کردن نیروهیل ئهمنیهتی و ئێنتزامی رژیم کهمتر بی وه مهردم ههوڵ دان که دیشهیل ماهوارهێ خۆیان قایم بکهن وهلی رۆژ له دیواێ رۆژ ئێستفاده کردن مهردم له ماهواره فره و فرهترهو بود وه سهخت گیری کردن و فهزاێ ترس و وهحشهت درس کردن له ناو مهردم له شارهیل کورد نشین وهلاێ نیروهیل ئێنتزامی رژیمهو ئهراێ رژیم نهتیجهێ ئهکس داشتیه وه ئێگه مهردم کوردستان نه تهنیا باکێ له رژیم نهێرن و ئازادانه له ماهواره ئێستفاده کهن بهڵکه نواێ چیین مامورهیل دهولهتی وه ناو مالهیل خۆیان گرن ، ئهراێ یهکه ئێستفاده کردن له ماهواره له حهقهیل سهرهتایی و بێ ئێ لاو ئهولاێ خۆیان زانن . رژیم کوینهپهرهس ئاخۆندی ئێران یهکێک له مهعدود رژیمهیل عهقیدهتی یه که سیاسهت خۆێ له بان دژمنی کردن وهگهرد عێلم و دانش رۆژ وه ئازادی و دموکراسی ئهراێ مهردم دامهزریاس وه ئهوه 32 ساله ههوڵ داس وه ئێ سیاسهت خۆێ یه دریژه بهێ . سیاسهتێک که له بان خهم و ماتهم و گریان وه دریژه دان وه رێ و رهوش ئێمامهیل و پیامبهرهیل 1400 سال وهرهو دیوا دامهزریاس . ئهڵبهت نهوهتیاێ دیاره که کار وهدهسهیل خۆد رژیم له ئهو قاعدهو مۆستهسنان وه ئهو سیاسهتهیله تهنیا له بان سهر مهردم فهقیر ئێجرا بون . کار وهدهسهیل و منالهیل ئهوان و کهس و کاریان له ناو ناز و نێعمهت و کاخ وه سهر بهن وه کهسێک حهق دهخالهت کردن له زنهی ئهوان نهێرێ وهلی وهختێک نهوبهت مهردم رهسێ بایه دهس له گشت خوهشیهیل ئێ دنیا بشورن وه تهنیا وه ئهو دنیا فکر بکهن وه داشتن ماهواره تیوهنێ وه گۆنایل ئهوان ئێزافه بکهێ . جاڵب یهسه که له ناو ئێ گشتێ ساله که له عۆمر ئهو رژیمه ئهو پشت سهر نهیمن ، کار وهدهسهیل ئهو رژیمه نهتواسن بفامن که یهێ رۆژێک مهردم له سهخت گیری ئهوان وه خاتر داشتن دهسگاێک ماهواره وه تهنگ تیهن وه مهجبور بون له نواێ زور وهتن ئهوان بوسن وه وهختێک مهردم یهێ دهس له نواێ ئهوان بوسن وه دهس وه مقاوهمهت بهن تیوهنن کاخهیل ئهوان وێران بکهن . کار وهدهسهیل بێ مهنتق رژیم له ئێ ئهسله خافل مهنیون که ئهگهر مهردم رۆژێک له تهوهین کردن ئهوان وه شۆعور خۆیان ئهو دهنگ بان تیوهنن ئهراێ ئهوان خهتهرناک بون که ئێ جوره که دیاره دێرێ ئهو رۆژهیله هاتیاس وه مهردم وه راسی دی له گشت چشت ئهو رژیمه شهکهت بینه وه توان له نواێ گشت سیاسهتهیل و بهرنامهیل رژیم که وه نیهت درس کردن فهزاێ ترس و وهحشهت درس کردن له ناو مهردم وه ئێجرا نریهن بوسن وه بێ گۆمان وسن . وه ئۆمید ئهو رۆژه که گشت مهردم ئێران ئهراێ وه دهس هاوردن حهقهیل رهواێ خۆیان ئهو دهنگ بان وه دهس زۆرئیوشهیل و زوان نهفامهیل له سهر خۆیان ئهراێ ههمیشه کۆتا بکهن وه دی کهسێک نیهیونێ که مامورێک دهولهتی پڵهکانێک ئهو گژ مالهکهێ ناس وه دێرێ له دیوار مالهکهێ ئهوبان چود ئهراێ ئهو خوار خسن دیش ماهوارهکهێ وه یا دهر مالهکهێ وه لهقه شکێدو ، گشت مهلهکهێ وه خاتر یهێ دهسگا ماهواره وه یهکا رشیهێ .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .