راپۆرت
جهیمز ئێستاینبرگ له جی نشینهیل وهزیر ئۆمور دهرهوهێ ئێمریکا وه دانیال ئایالون هاوتاێ ئێسرائیلی ئهیو ، دهمهتهقهیل ئێستراتژیک دۆ ولات وه ناو رۆژ دۆشهمه له پایتهخت ئێمریکا ئهو پا کردن . ئهوان وهگهردێ ئهو دهیشت دان بهیانیێک شهریکی وهتن : ئاشکراس که ئێران یهکێک له گهوراترین مشکلهیلێکه که ئیمه ئێمرو له خاوهرناوراس وهگهردێ ئهوه رووهریویم . ئهو دۆ دیپلۆمات پایه بهرزه له دریژهێ قسیهیل خۆیان وهتن دریژهێ وه قسیه نهکردن جمهوری ئێسلامی له تهئههۆدهیل جهانی ئهتۆمی خۆێ وه پشتیوانی ئهو رژیمه له گۆروهیل تروریستی ، بائس نگرانی جدی دۆ ولات ئێمریکا و ئێسرائیل وه جامعهیل جهانی یه . جهیمز ئێستاینبرگ وه دانیال ئایالون له دریژهێ سیاسهت دوجورهێ ئێمریکا و دهسلاتهیل گهورا که وه بان مزاکرهێ چهن جوره وهگهردێ جمهوری ئێسلامی وه تهحریم ئێران له سورهت نهگویهرانن موزهێ ئهتۆمی رژیم ئهو ولاته دامهزریایه ، پشتیوانی کردن . ئهوان له ناو بهیانیهکهێ خۆیان ، تهئامۆل و فشار ئهراێ گویهرانن حساو کتاوهیل ئێستراتژیک جمهوری ئێسلامی لازم زانسن . جمهوری ئێسلامی ئهو سیاسهته بێ سود زانێ وه ئێدئا کهێ تهسلیم فشارهیل جهانی نیهود . ئهو مزاکره وه ناو ئهو دۆ کار وه دهس دۆ ولات ئێمریکا و ئێسرائیله وه وهختیک ئهو پا بی که مهحمود ئهحمهدی نژاد سهفهر دۆ رۆژێک وه لۆبنان داشت که وهرجله ئهو سهفهره کار وهدهسهیل ئێمریکایی و ئێسرائیلی وه بارهێ هاتن ئهحمهدی نژاد ئهراێ لۆبنان هۆشدار دایون وه له ئهو سهفهره وه ئۆنوان تهحریک کردن مهردم و گۆروهیل تنرهو لۆبنانی وه زد ئێسرائیل ناو بردیون . کاترین ئهشتون ، مهسئول سیاسهت دهرهوهێ ئێتحادیهێ ئۆروپا وه نمایهندهێ گۆرو 5 بێزافهێ 1 ، یانێ 5 ئهندام دایم شهوراێ ئهمنیهت و ئالمان ، چهنێک لێیهوهر وه ئێران پێشنهاد دایود تا مزاکرهیل ههستهیی ههر دۆ لا وه ناو مانگ نوامبر دهس وه کار بکهن . جمهوری ئێسلامی جارێک وه ئێ خوازیاره جواو نیاس . وهلی ئهلی ئهکبهر سالحی ، رهئیس سازمان ئێنرژی ئهتۆمی ئێران ، رۆژ دۆشهمهێ لێیهوهر بیانیهێ تێران که زویتر وه خاتر ههول و تلاش برزیل و تۆرکیه وه دهس هاتیود وه ولاتهیل رۆژئاوا ئهوه رهد کردن ، بنهواێ خاسێک ئهراێ دهس وه کار مزاکرهیل زانس . ئێمریکا و ئێسرائیل ههمیشه تهئکید کردنه وه نواێ بهرنامهێ ئهتۆمی رژیم جمهوری ئێسلامی ، گشت رێحهلهیل له نهزهر دێرن که وه قسیهێ کارناسهیل سیاسی ، یه ئێشارهێک وه له سهر جی مهنن رهێ حهل نێزامی له لاێ ههول و تلاشهیل دیپلۆماتیکه . ئێمریکا که وه بان خاس تر بی ین تهوان و تهجهیزات ئێسرائیل له خاوهر ناوراس تهئکید دێرێ ، چهنێک لێیهوهر مووافقهت کرد وه ناو چهن سال ئایهنده ، شمارێک تیارهێ شهر کهر ئێف 35 وه ئهو ولاته بفروشهێ . ئهو تیارهێ شهر کهره که رادار نیهتیوهنێ رهد ئهوه پیا بکهێ وه قهراره تا چهن سال تر وهلاێ ئهرتش ئێمریکاوه وهلێ ئێستفاده بکریهێ ، یهکێک له مدرن ترین تیارهیل شهر کهر له نوع خۆێ وه حساو چود . قهراره ئێمریکا وه نواێ نزیک 3 مێلیارد دۆلار ، 20 فهروهند تیارهێ شهر کهر ئێف 35 تا سال 2016 ێ میلادی وه ئێسرائیل تهحویل بهێ .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .