راپۆرت
رۆژ سێشهمهێ لێیهوهر 27 مێهرمانگ ، رامین مێهمان پهرهست ، قسیه کهر وزارهت دهرهوهێ جمهوری ئێسلامی ، نهێریان سوخت وه تیارهیل مسافرکیش ئێرانی له برێک وه فرودگایل دهرهکی تهئیید کرد وه وهت : دێریم وه بارهێ شێوهێ وسان و مقاومهت وه نواێ ئهو کاره پرس و جور کهیم ، ئهلبهت ئهیو نهوهت چه کارێک تیوهنن بکهن وه نواێ دهولهتهیلێک که حازر نی ین وه تیارهیل مسافرکیش ئهوان سوخت بهن . مێهمان پهرهست وهت : وه داخهوه برێک له شرکهتهیل ولاتهیل رۆژئاوا ئهراێ نیان سوخت وه تیارهیل ئێرانی تهسمیمهیل گهنێک گرتنه . وهرجله یه وزارهت دهرهوهێ جمهوری ئێسلامی ، خهوهرهیل مهربوت وه نوا گرتن برێک له شرکهتهیل سوخت رهسنی ههوایی له داین سوخت وه تیارهیل ئێرانی وه راس نهزانس وهلی ئێگه وه دیواێ چهن جار ریو دان ئهو ئێتفاقه ، کار وهدهسهیل رژیم مهجبور وه ئێعتراف کردن بین وه دهس وه شاخ و شانه کیشان دان . له ناو تیر مانگ ئێمسال ، دهبیر ئهنجۆمهن سێنفی شرکهتهیل تیاره دار ئێران خهوهر دایود : دیواێ ئهو دهیشت دریان قانون تهحریمهیل یهێ ترهفهێ ئێمریکا وه زد ئێران ، فرودگایل بریتانیا ، ئالمان و ئێمارات له داین سوخت وه تیارهیل ئێرانی نوا گرن . هاو وهخت قسیه کهر کۆمیسیون سیاسهت دهرهوه و ئهمنیهت ملی مهجلس له سوخت نیان فرودگایل کووێت وه تیارهیل ئێرانی خهوهر دایود . لێره چشتێک که قابل باس کردنه وه گهن نی یه که وه ئهوه ئێشاره بکهیم موزهێ دهولهت ئێران له ئهوهلهیل دهس وه کار سوخت نیان شرکهتهیل دهرهوه وه تیارهیل ئێرانی بی . له ئهو وهخته قسیه کهر وزارهت دهرهوهێ ئێران له جواو سۆئالێک له ئهو باره وهت : خهوهرهیل نادرسێ وه ئێ باره ولاوهو بینه وه ولاو بی ین خهوهر نهێریان سوخت وه تیارهیل ئێرانی ، ههول و تلاش ئهراێ درس کردن جورهیلێک فهزاێ مهنفی شهر رهوانی وه حساو هاورد . رامین مێهمانپهرهست وهتیود : کار وه دهسهیل ولاتهیل ناو بریاێ ئێ خهوهرهیله وه درو زانن . وهگهرد گشت ئێ چشتهیله ، له ناو مانگهیل دیواتر ههم راپۆرتهیل وهرولاوێک له نهێریان سوخت وه تیارهیل مسافرکیش ئێرانی له شمارێک وه فرودگایل ئۆروپایی ولاوهو بی که له مهوردهیلێک بائس درس بی ین مشکل وه یا گویهریان له بالهو گرتن ئهوان بی . وه ههر حال رامین مێهمانپهرهست ، قسیه کهر وزارهت دهرهوهێ جمهوری ئێسلامی که ئێگه مهجبور وه ئێعتراف کردن وه بارهێ ئهو راستی یه بی نهوهت : دهولهتهکهێ چه کارێک تیوهنێ وه نواێ ولاتهیلێک که حازر نی ین وه تیارهیل ئێرانی سوخت بهن ئهنجام بهێ ، وه له کام بهش ئهوان منافهێ ئهو دهولهتهیله وه خهتهرهو خهن وه جور ههمیشه وه چهن تههدید وشک و خالی رزایهت دا .
تروسکه وبلاگێکه وه زاراواێ شیرین کوردی کهڵهۆری ، ئۆمێدوارم وه کار کردن له بان ئێ وبلاگه تیوهنسیوم خزمهت بیوچگێک وه هاو زوانەیل ئهزیز کردیوم و بکهم .