فهرماندهێ نیرو ئێنتزامی ئیوشێ : پۆلیس له رابتهێ دیوهت و کور دهخالهت نیهکهێ :
باوهر کهن م که له قسیهیل ئهو کار وهدهس رژیمه شهرم کهم وهلی ئهیو خوێ چیون شهرم نیهکهێ وه راسی فره ئهجیبه ، ئاخر ههرکهس که له ناو ولات ئێران 5 رۆژ زنهی کردیاس وه یا کهێ خاس زانێ که ئهو کار وهدهس دهولهتی دێرێ درو ئیوشێ ...درێژهی وتار
کار وهدهسهیل دهولهتی رژیم ئێسلامی ئێران وه شکهست خۆیان له تهرح کووهو کردن ئانتن ماهوارهیل ئێعتراف کردن :
یهێ نمایهندهێ مهجلێس رژیم وهتیود : تهرح کووهو کردن ئانتن ماهوارهیل وهلاێ نیرو ئێنتزامیهو هیچ نهتیجهێک نیاشتیه ...درێژهی وتار
وه خاتر هاتن خامنهیی ئهراێ کرماشان فهزاێ ئهمنیهتی له ئهو شاره تنترهو بی یه :
راپۆرتهیل رهسیاێ له شار کرماشان له تن بی ین فهزاێ ئهمنیهتی حاکم وه ئهو شاره له ناو چهن رۆژ لێیهوهر وه خاتر هاوردن شمار فرێک نیرو ئهمنیهتی ، دلنگ شهخسی له وهر وه نیرو ئێنتزامی رژیم له ئۆستانهیل هاوسا ئهراێ ناو ئهو شاره نیشان دێرن ...درێژهی وتار
له ناو ههفتێک که ئهو پشت سهر نایمن یهکێک له چاڵاکهیل کورد له رۆژئاواێ کوردستان وه زهرب گۆلهێ پیاگهیل دهولهتی رژیم بهشار ئهسهد گیانێ له دهس دا :
مهشعهل تهممو یهکێک له چالاکهیل سیاسی ناسیاێ رۆژئاواێ کوردستان و وڵات سوریه له لاێ 4 مزدور رژیم بهئس سوریهوه له ناو مالهکهێ خوێ له شار قامشلو وه ئهیو حهمله بی وه وه داخهوه له ناو ئهو حهمله گیانێ له دهس دا ...درێژهی وتار
گهوراترین پروژهێ گازی رۆژئاواێ ئێران ئهراێ جارێک تر له کار کهفت :
وه ئێعتراف خهوهر رهسنی حۆکومهتی مێهر ، پالایشگا گاز ئیلام که گهوراترین پروژهێ گاز رۆژئاواێ ئێرانه دیواێ چهن جار دوواره دهس وه کار کردن وهگهرد رکود ریووهریو بی یه . ئهڵبهت نهوهتیاێ نهمێنێ یه یهکمین جار نی یه که پروژهیل وزارهت نهفت رژیم له ئۆستان نهفت و گاز دار ئیلام وهگهرد رکود ریووهریو بود . قابل باسه فرێک له پروژهیل رژیم له ئۆستان ئیلام یا له حال رکود وه سهر بهن یا ئهسلهن ئێجرا نهیونه وه کارێک له بان ئهوانه ئهنجام نهیریایه . ههر لێ رابته چهنێک لیێهوهر پروژهێ پتروشیمی ئیلامیش وه خاتر نیاشتن ئێعتبار له کار کهفتیود . ئۆستان ئیلام خاون 4 له سهد زهخیرهیل نهفتی وه 11 له سهد زهخیرهیل گازی وڵات ئێرانه وهلی وه داخهوه وه یهکه گشت ئهو زهخیرهیل نهفتی و گازی یه دێرێ ، وه شاتی خۆد کار وهدهسهیل رژیم ، ئهو ئۆستانه یهکێک له فهقیرترین ئۆستان ئێرانه وه فرێک له مهردم ئهو ئۆستانه دایم وه خاتر کار و کاسبی سهرگهردان شارهیل تر ئێرانن . فهقیری و بێ ئێمکاناتی ئۆستان ئیلام وه داخهوه بی یسه بائس یه که فرێک له ئاسیبهیل کۆمهڵایهتی له ئهو ئۆستان کهم جهمعیهته سهر هێز بهن ، ئاسیبهیلێک جور خۆدکوشی وه ئێعتیاد که دیاردهیل فره تازێکێن له ئهو ئۆستانه . ئهراێ نمونه ههر کهس تهنیا جارێک له ئۆستان ئیلام رهد بیود زانێ که ئهو ئۆستانه چه مشکلهیلێک دێرێ . گهنێ و نائێستاندارد بی ین جادهیل ئهو ئۆستانه یهکێک تر له مشکلهیل زنهی مهردمه که وه داخهوه فره جار بائس تهسادف بود وه کهم نی ین ئێنسانهیل بێ گۆناێک که له ئهو رێیهو گیانیان له دهس دهن . له مشکلهیل تر ئۆستان ئیلام نهیون نهخوهشخانهیل خاون ئێمکانات و وهسیلهیل مۆدرن پزشکی یه که ئێگهیش که ئێگه سهر فرێک له مهردم ئۆستان مهجبورن ئهراێ فرێک له ئهمهلهیل جهراحی وه بهستهری بی ین ، ههزینهیل فرێک تهقهبۆل بکهن وه رێ شارهیل تر ئێران له وهر بێرن ، یه له وهختێکه که ئۆستان ئیلام خاون خاسترین دۆکتورهیل دڵسوز مهحهلی یه وه تهنیا داشتن یهێ نهخوهشخانه که گشت ئهبزارهیل مۆدرن پزشکی داشتود تیوهنێ فرێک له مشکلهیل مهردم حهل بکهێ . مشکلهیلێک که تهنیا وه پیول و بودجه حهل بون وه حهوهجه وه کهرهم کاروهدهسهیل نێزام ئێسلامی دێرێ .
له ناو ههفتێک که ئهو پشت سهر نایمن ، رهئیس پۆلیس رژیم ئێسلامی ئێران وهت : ماهوارهیل وهگهرد جدیهت کووهو بون :
خوهزگهو کارهیل تر ئهو رژیمه ههر وه ئێ جدیهته ئهنجام بێرێ . ئێسمائیل ئهحمهدی مۆقهدهم ، فهرماندهێ نیرو ئێنتزامی رژیم ئاخۆندی ئێران وهتیود : فرێک له شهبهکهیل ماهوارهیی جور یهێ پایگا و ئۆتاق عهمهلیاتی وه زد نێزام ئاخۆندی ئێران کار کهن وه وه قسیهێ ئهیو ههدهف ئهوان سیه نیشان دان حال و رۆژ ئێران ، وهتن قسیهیل ناراس و نیشان دان مشکلهیل ناو ئێرانه ...درێژهی وتار
قهول رهسیدگی کردن وه مشکلهیل کارگهرهیل پارسیلون خۆرهم ئاوا وهلاێ کار وهدهسهیل دهولهتی یهو :
له حال و رۆژێک که کارگهرهیل کارخانهێ پارسیلون خۆرهم ئاوا فرهتر له 8 مانگه دهسمۆزد وه پیان نهێریاس وه فره جار ئهراێ حهڵ کردن مشکلهیل خۆیان کووهو بی ین ئێعترازی ئهنجام دانه ، کار وهدهسهیل رژیم ئهراێ جارێک تر قهول و قهرار درو وه ئهو کارگهرهیله دانه . وه خاتر دریژهێ ئێعترازهیل و فره بی ین فشار کارگهرهیل کارخانهێ ناوبریاێ وه بان کار وهدهسهیل دهولهتی ، حهسهن شهریعهت نژاد ، جی نشین سیاسی ئهمنیهتی رژیم له ئۆستان لۆرستان وهتیود : نیشتن کۆمیسیون کارگهری ئۆستانداری وهگهرد نمایهندهیل کۆمیسیون کارگهری شهوراێ ئهمنیهت رژیم وه خاتر پرس و جور کردن له بارهێ حال و رۆژ کاری و مشکلهیل کارخانهێ پارسیلون خۆرهم ئاو وهێ زیو ئهوپا بود . ئهو کار وهدهس رژیمه له ئۆستان لۆرستان زهحمهت وه خۆێ نیایود که بیوشێ ، کارگهرێک که 8 مانگ حۆقوق نهێرتیاس بایه وه چوه گۆزران بکهێ وه ئهرا چوه دیواێ 8 مانگ بایه تازه له بارهێ حال و رۆژ ئهوان پرس و جور بکریهێ . ئهیو ههر لێوا نهوهتیود ، ئهرا چوه بایه ئهو کارخانه نهتیوهنێ حۆقوق کارگهرهیل خۆێ بهێ وه وهزیفهێ دهولهتێک که ئێدئا کهێ تیوهنێ ئێقتساد دۆنیا مۆدیریهت بکهێ چوهس وه ئهرا چوه نهتیوهنسیه له ناو ئێ 8 مانگه پیول ئهو کارگهرهیله جور بکهێ . ئۆستان لۆرستان یهکێک له ئۆستانهیل فهقیر ئێرانه که کارخانهیل کهمێک له ئهو ئۆستانه فعالن وه ههر ئهو چهن کارخانهێ خۆرد و رێزیشه که تهقه تهقێ کهن لێوا له داین حۆقوق کارگهرهیل خۆیان ناتوانن .
قهول رهسیدگی کردن وه مشکلهیل کارگهرهیل پارسیلون خۆرهم ئاوا وهلاێ کار وهدهسهیل دهولهتی یهو :
له حال و رۆژێک که کارگهرهیل کارخانهێ پارسیلون خۆرهم ئاوا فرهتر له 8 مانگه دهسمۆزد وه پیان نهێریاس وه فره جار ئهراێ حهڵ کردن مشکلهیل خۆیان کووهو بی ین ئێعترازی ئهنجام دانه ، کار وهدهسهیل رژیم ئهراێ جارێک تر قهول و قهرار درو وه ئهو کارگهرهیله دانه . وه خاتر دریژهێ ئێعترازهیل و فره بی ین فشار کارگهرهیل کارخانهێ ناوبریاێ وه بان کار وهدهسهیل دهولهتی ، حهسهن شهریعهت نژاد ، جی نشین سیاسی ئهمنیهتی رژیم له ئۆستان لۆرستان وهتیود : نیشتن کۆمیسیون کارگهری ئۆستانداری وهگهرد نمایهندهیل کۆمیسیون کارگهری شهوراێ ئهمنیهت رژیم وه خاتر پرس و جور کردن له بارهێ حال و رۆژ کاری و مشکلهیل کارخانهێ پارسیلون خۆرهم ئاو وهێ زیو ئهوپا بود . ئهو کار وهدهس رژیمه له ئۆستان لۆرستان زهحمهت وه خۆێ نیایود که بیوشێ ، کارگهرێک که 8 مانگ حۆقوق نهێرتیاس بایه وه چوه گۆزران بکهێ وه ئهرا چوه دیواێ 8 مانگ بایه تازه له بارهێ حال و رۆژ ئهوان پرس و جور بکریهێ . ئهیو ههر لێوا نهوهتیود ، ئهرا چوه بایه ئهو کارخانه نهتیوهنێ حۆقوق کارگهرهیل خۆێ بهێ وه وهزیفهێ دهولهتێک که ئێدئا کهێ تیوهنێ ئێقتساد دۆنیا مۆدیریهت بکهێ چوهس وه ئهرا چوه نهتیوهنسیه له ناو ئێ 8 مانگه پیول ئهو کارگهرهیله جور بکهێ . ئۆستان لۆرستان یهکێک له ئۆستانهیل فهقیر ئێرانه که کارخانهیل کهمێک له ئهو ئۆستانه فعالن وه ههر ئهو چهن کارخانهێ خۆرد و رێزیشه که تهقه تهقێ کهن لێوا له داین حۆقوق کارگهرهیل خۆیان ناتوانن .
ریو دان یهێ تهقینهوه له دهور و وهر شار مهریوان قۆربانێ گرت :
خهوهرهیل رهسیاێ له شار مهریوان نیشان له یه دێرن وه خاتر ریو دان یهێ تهقینهوه له نزیکی ئاوایی حهسهن ئاوله سهر وه شار مهریوان ، کهسێک وه ناو مهحمود کۆنه پوشی گیانێ له دهس داس . مهحمود کونهپوشی که خاون ئات و ئیالێش بی یه ، وهخت نگهبانی له مهحهلێک له نزیکی ئاوایی حهسهن ئاوله وه خاتر دهسکاری کردن وه یا خواردن لهش ئهیو وه مادهێ قابل تهقینهوێک که تا ئێگه جور ئهوه دیاری نهکریاس ، گیان خۆێ له دهس داس . له ناو خهوهرهیلێک که له ئهو باره ولاوهو بیون هاتیود : تهرم کهس ناوبریاێ ئهراێ نهخوهشخانێک له شار سنه کڵ کریایه وه مامورهیل دهولهتی له داین تهرم ئهو کهسه وه کهس و کارێ نوا گرتنه . قابل باسه تا ئێگه چهن کهسێک له مهردم ئهو مهنتهقه وه خاتر خواردن لهش ئهوان وه مهوادهیل تهقینهوهێک که له نیروهیل دهولهتی وه جی مهنیاس ، گیانیان له دهس دانه . مهوادهیلێک که دیار نی یه کار وهدهسهیل دهولهتی وه چه دهلیلێک ئهوانه له ئهو مهنتهقه ولاوهو کهن وه وهێ جور گیان ئێنسانهیل بێ گۆناێک گرێ .
بێ خهوهری له حال و رۆژ یهێ چالاک سیاسی :
خهوهرهیل رهسیاێ له بێ خهوهری و بێ چارهنویسی چالاک سیاسی کورد ، بۆرهان کهریمی نیشان دێرن که رۆژ چوارشهمه 6 مانگ بهران له جادهێ ناوێن جوانرو ، رهوانسهر وهلاێ مامورهیل ئهمنیهتی رژیمهو دهسگیر وه ئهراێ زندان کڵ کریایود . له ناو خهوهرێک له ئێ رابته هاتیود : بۆرهان کهریمی له ناو ئهوپا بی ین یهێ ئیست وشکانن له ناوێن جادهێ جوانرۆ ، رهوانسهر وهلاێ نیروهیل ئهمنیهتی رژیمهو ، دیواێ بێ ئێحترامی کردن نیروهیل ئهمنیهتی وه ئهیو ، دهستگیر وه ئهراێ جیێک نادیار کڵ کریهێ . ئیوشن ههوڵ و تهلاش خانوادهێ بۆرهان کهریمی ئهراێ وه دهس هاوردن خهوهرێک له بارهێ ئهیو بێ نهتیجه بی یه . چالاکی سیاسی وه ههر جوره قسیه کردن له بارهێ سیاسهت رژیم ئێسلامی له ئێران وه ئهوهیش فرهتر شارهیل کورد نشین ، جۆرمێک گهورا وه حساو تیهێ وه لێوا کار وهدهسهیل ئهمنیهتی رژیم وه خۆیان ئێجازه دهن له ههر جی و مهکانێک نواێ مهردم بێرن وه بێ داشتن دهلیل و مهدرهک خاسێک ، ئهوان دهسگیر وه ئهراێ سیاچالهیل خۆیان کڵ بکهن . بێجله چالاکیهیل سیاسی ، کار وهدهسهیل رژیم فره جار حهتا چالاکهیل ئهدهبی و فهرههنگی و کۆمهلایهتیش دهسگیر وه دیواێ ئهزیهت و ئازار دان فرێک ئهوان ئهراێ زندان کل کهن . له ئێتهامهیلێک که رژیم فره جار وه چالاکهیل کورد دهێ دژمنی وهگهرد خۆدا و نێزام وه هاوکاری کردن وهگهرد حێزبهیل کوردی مۆخالف رژیمه . ئێتهامێک که فره جار بائس تیرواران وه یا له دار دریان وه یا زندانهیل دریژ وهخت ئهراێ چالاکهیل کورد بی یه وه کهم نی ین منالهیل کوردێک که ئێگه له زندانهیل رژیم وه سهر بهن وه مهرگ وه داخهوه له دهور سهر شمارێک له ئهوان خڕ خۆێ ، ئهراێ چوه شمارێک له ئهوان حۆکم له دار دریان دێرن .
کۆشتن کاسبکارهیل و کۆڵبهرهیل کورد دریژه دێرێ :
خهوهرهیل رهسیاێ له شار سنه ، له گیان له دهس دان یهێ کاسبکار مهرزی تر وه خاتر تهقه تفهنگ کردن مامورهیل ئهمنیهتی و ئێنتزامی رژیم له نوار مهرزی شار پهنجوێن له باشوور کوردستان نیشان دێرێ . ئهو کاسبکاره که ناوێ خهبات بهرزهنجی وه خهلک ئاوایی کوله ههرد سهر وه شار سنه بی یه ئێوارهێ رۆژ شهمه 9 مانگ بهران ههر وهو جوره که وه پێ ئێشاره بی ئهو وهر گۆلهێ نیروهیل ئهمنیهتی و ئێنتزامی رژیم کهفتیود وه گیانێ له دهس دایود . کاسبکاری و کۆڵبهری کار و شۆغل پڕ خهتهرێکه که فرێک له مهردم کورد وه ئهوهیش فرهتر له نوار مهرزی وه خاتر بژی رۆژانهێ خۆیان و خانوادهیلیان وه وه خاتر نهیون کار و شۆغل و دهرامهد له کوردستان ، مهجبور وه ئهنجام دان ئهوه بون . له مشکلهیل تر کاسبکارهیل و کۆڵبهرهیل کورد بێجله کۆشیان و زهخمی بی ین ئهوان وه دهس نیروهیل دهولهتی ، باج گرتن نیروهیل دهولهتی له ئهوانه . ئهراێ نمونه فره جار یهێ کۆڵبهر مهجبور بود پیولێک که وه خاتر کیشان یهێ بار سهگین که سائهتهیل فرێک وه کۆڵ خۆێ کیشێدێ تا وه دهس خاون جنس برهسێنێدێ وه نیروهیل دهولهتی بهێدن تا خۆێ له دهس ئهوان نجات بهێ . فره جار نیروهیل دهولهتی وه گرتن باج و رشپهت له کۆڵبهرهیل و کاسبکارهیل ئێجازهێ هاوردن و بردن بار وه ئهوان دهن وه فرهجاریش ئهوان ئهو وهر گۆله دهن وه بائس کۆشیان و وه تنی زهخمی بی ین ئهوان بون . له ههر دۆ شێوه یه ههر کۆڵبهرهیل و کاسبکارهیل کورده که زهرهر کهن ئهراێ یهکه یا گیانیان چود وه یا مالیان .
یهێ زندانی سیاسی کورد له زندان شار کرمان وه تهور دزیهتی له دار دریا :
دهم وهرهسو رۆژ سێشهمه 12 مانگ بهران دهسگا قهزایی رژیم ، یهێ زندانی سیاسی کورد له زندان شار کرمان وه ناو عهزیز خاک زاد وه تهور دزیهتی وه نائاشکرا له دار دا . دهسگا قهزایی رژیم ئاخۆندی ئێران ، یهکم جار زندانی سیاسی کورد عهزیز خاک زاد 29 ساله خهلک شار سهلماس وه ئێتهام ههمیشهگی خۆیان یانێ دژمنی وهگهرد خۆدا و نێزام وه هاوکاری کردن وهگهرد یهکێک له حێزبهیل کوردی مۆخالف رژیم وه ئێعدام مهحکوم کردیود . وهلی دیواتر وه خاتر ههوڵ و تهلاش خانواده و وهکیل مۆدافهێ کهس ناوبریاێ حۆکم له دار دریان ئهیو وه 5 سال زندان وه تهبعید ئهراێ شار کرمان گویهرانیود ، وهلی دۆشهمه شهو 11 مانگ بهران ، یهێ دهفه کار وهدهسهیل زندان رژیم ، عهزیز خاک زاد له بهند عۆمومی ئهو دهیشت بهن وه کلێ کهن ئهراێ سۆلولهیل تهک کهسی وه دهموهرهسو رۆژ سێشهمه حۆکم گویهریاێ له دار دریان ئهیو وه ئێجرا نهن . له ئێ دنیا ههر مشکلێک که ئهراێ مهردم ههر نۆقتهێ له ئێ کۆرهێ خاکی یه درس بود ، یهکم جیێک که وه نهزهر ئهوان رهسێ ئهراێ حهڵ کردن مشکلهیل خۆیان ، دهسگایل قهزایی دهولهتهکانه ، وهلی وهداخهوه له ئێران وه ژیر دهسلات رژیم ئاخۆندی وه ئهوهیش فرهتر ئهراێ منالهیل کورد ، حۆکمهیل و قانونهیل دهسگایل قهزایی رژیم لێوا وه رهحهتی گویهریهن وه ئێنسانێک که تا دیوهکه 5 سال حۆکم زندان داشت ئێمرو له دار دریهێ بێ ئهوه که ئاو له ئاو تهکان بهخوێ وه یا کهسێک له ئهو باره جواو دهر بود . رژیم فرهجار دهس وه گویهرانن حۆکمهیل چالاکهیل کورد داس وه ئهوهیش وه ئهکس قانونهیل قهزایی خۆێ که فره جار له دادگا دوواره نهزهر دهر حۆکم زندانی کهمهو بود ، وه ئێزافه کردن حۆکم زندانیهیل سیاسی دهس دێ وه له مهوردهیلێک وهێ جوره که ئهگهر زندانی کورد بود ، حۆکم زندان وه ئێعدام گویهرنێ . ئێحسان فهتاحیان پێشمهرگه و ئهندام کۆمهله یهکێک تر له زندانیهیل کوردێک بی که له دادگا یهکم حۆکم 10 سال زندان گرت وهلی دادگا دوواره نهزهر دهر حۆکم 10 سال زندان ئهیو وه ئێعدام گویهران . وه ئهیو وه داخهوه دهموهرهسو رۆژ چوارشهمه 20 مانگ خهزان 1388 له زندان شار سنه له دار دریا .کار وهدهسهیل حۆکومهتی رژیم ئاخۆندی ئێران ئهراێ جارێک تر له بارهێ تهزاهرات مهردم سوریه ئهو قسیه هاتن :
ئێ جاره عهلی ئهکبهر سالحی وهزیر دهرهوهێ رژیم له وهعدهو وهعیدهیل رژیم بهئس سوریه ئهراێ ئهنجام دان ههڵوژاننهیل پارلمانی ، دهر کردن ئێجازهێ دامهزریان چهن حێزب تازه وه ئهوپا بی ین ههڵوژاننهیل شهورایل مهحهلی وه ئۆنوان رفورمهیل لازم له نواێ خوازیارهیل مهردم ولات سوریه پشتیوانی کردیود ...
درێژهی وتار
بان کی مون دهس وه پهڵپ گرتن له ئهدهبیات سیاسی ئهحمهدی نژاد دا :
بان کی مون دهبیر گشتێ سازمان مێلهتهیل یهکگر له چاو وه پێکهفتن خۆێ وهگهرد ئهحمهدی نژاد رهئیس جمهوری رژیم ولایهت فهقی ئێران ، دهس وه پهڵپ گرتن له قسیه و باسهیل ئهیو له بارهێ ئێتفاق هۆلۆکاست وه حهملهیل 11 سپتامبر دایود ...درێژهی وتار
کار وهدهسهیل دهولهتی ئێران له بارهێ ئاخرین ئامار کهسهیل تیوش بی وه ئیدز خهوهر دهن :
له ناو راپۆرت ولاو بی وهلاێ وزارهت بێهداشت رژیمهو هاتیاس : تا یهکم پهرپهر ئێمسال وه گشتێ 23 هزار و 125 کهس تیوش بی وه نهخوهشی ئیدز له ئێران ناسیانه وه ناو ئهوان وه ناو ئامارهو چی یه ...درێژهی وتار
حال و رۆژ خراو یهێ زندانی له شار پاوه :
له ناو راپۆرتهیل رهسیاێ له ئهو باره هاتیود : فاروق یوسفی خهلک ئاوایی نوریاب سهر وه شار پاوه که چهن ههفته لێیهوهر وه خاتر ئێتهامهیل هیچ و پوچ دهسگیر و ئهراێ زندان کڵ کریایود ، جارێک ههر وهگهرد چارهنویس نادیارێکا ریووهریووه . قابل باسه کهس ناوبریاێ وه خاتر شکهنجهیل جسمی له حال و رۆژ خراوێک وه سهر بردیاس و بهێ ، جورێک که ئیوشیهێ گۆرچگهیل ئهیو خوێن دهڵنن وه له نهخوهشخانهێ شار پاوه له ژێر فشارهیل ئهمنیهتی بهستهری یه . ئیوشن مامورهیل ئهمنیهتی رژیم له ئهو حال و رۆژه وه ئهیو وهتنه : مهسئلهێ خراو بی ین حال و رۆژ جسمی خۆی نهبایه ئهراێ کهسێک باس بکهێ وه بایه بیوشێ که وهرجله دهسگیری نهخوهش بی یه . یه له حالێکه که ئیوشیهێ فاروق وهرجله ئهوه که دهسگیر بود ، هیچ مشکل جسمیێک نیاشتیه .
کۆشتن کاسبکارهیل و کۆڵبهرهیل کورد له نوار مهرزی خوهرههڵات کوردستان دریژه دێرێ :
کۆشتن کۆڵبهرهیل و کاسبکارهیل کورد له نهوارهیل مهرزی خوهرههڵات کوردستان وه دهس نیروهیل نێزامی رژیم ئاخۆندی چودن که بود وه یهکێک له گهورا مشکلهیل و نگرانیهیل مهردم کوردستان وه ههر وه ئهو خاتره له ناو ههفتهێ لێیهوهر دهرگیریهیلێلک له ناو مهردم و نیروهیل رژیم ولاوهو بیود . له ناو تازه ترین خهوهرهیل له بارهێ ئهو وهر گۆله دان کاسبکارهیل و کۆلبهرهیل فهقیر هاتیاس: سۆلهیمان مۆرادی ناسیاێ وه حاجی سووره خهلک ئاوایی کونهلاجان سهر وه شار پیرانشار که له تاریخ 18 نۆخشان مانگ له مهحهلێک وه ناو گهلی توان ئهو وهر گۆلهێ نیروهیل ئێنتزامی کهفتیود وه وه تنی زهخمی بیود وه دیواتر ئهراێ نهخوهشخانێک له شار رهزائیه کڵ کریایود وه داخهوه دیواێ 15 رۆژ وه خاتر تنی زهخمهیلێ گیان خۆێ له دهس داس . ئهو کۆلبهر فهقیره زویتریش وه خاتر تهقین مین له یهکێک له جهیهیل مهرزی کوردستان ، یهێ پاێ خۆێ له دهس دایود ، وهلی وهخاتر وه دهس هاوردن بژی رۆژانهێ خۆێ و خانوادهگهێ مهجبور بیود ههر وه ئهو یهێ پاێ نیاشتگ خۆێهو وه ئهو کار پڕ خهتهره دریژه بهێ . قابل وهتنه له ئهوهل سال ئێمسالهو تا ئێگه مامورهیل ئهمنیهتی و ئێنتزامی رژیم بائس کۆشیان 44 کۆڵبهر فهقیر وه زهخمی بی ین 31 کهس تر بینه . کۆشتارێک که وه تهوهجو وه هۆشدار مهردم و فرێک له سازمانهیل حۆقوق بهشهری له ناو و دهیشت کوردستان هێما ههر دریژه دێرێ .
وه له شار سنهیش مهردم له نواێ رشیان نیروهیل ئێنتزامی وه ناو مالهیلیان مقاومهت کردیون :
له ناو خهوهرهیل رهسیاێ له شار سنه هاتیاس : رۆژ یهێشهمه 3 مانگ بهران ، مهردم برێک له مهحهلهیل ئهو شاره که مامورهیل نیرو ئێنتزامی رژیم وه تهور وهرولاوێک وه بهانهێ کووهو کردن ئانتن ماهواره وه ناو مالهیل ئهوان رشیایون ، له نواێ ئهو کار نیرو ئێنتزامی یه دهس وه مقاومهت دانه وه حازر نهیونه که ئێجازه بهن مامورهیل نیرو ئێنتزامی وه ناو مالهیل خۆیان رێ بهن ...درێژهی وتار
دهرگیری له ناو مهردم و نیروهیل نێزامی رژیم له کوردستان ریو له فره بی ینه :
خهوهرهیل رهسیاێ له درس بی ین دهرگیری له ناو 3 شاروهند کورد وه یهێ واحێد گهشتی نیروهیل ئێنتزامی رژیم له ناوێن جادهێ کامیاران سنه نیشان دێرن . له ناو خهوهرهیلێک له ئهو باره هاتیود : دیوانیمهرو رۆژ یهێشهمه 3 ماگ بهران ، 3 شاروهند کورد له نزیکی ئاوایی تهوانکش له ناوێن جادهێ کامیاران ئهراێ سنه وهگهرد یهێ واحێد 8 کهسه له مامورهیل ئێنتزامی رژیم ریووهریو بون . ئهو کهسهیله وهگهرد مامورهیل رژیم که قهست ئهزیهت و ئازار ئهوان داشتیون بوده دهم قسیهیان که ئهو کاره بود وه بائس دهرگیری و لهیهک دان ئهوان . قابل باسه ئهو 3 کهسه تیوهنسیون تفهنگ له دهس 2 کهس له ئهو مامورهیله بسێنن وه دیواێ ئهوه که دهسیان وه تهفهنگ بهن بود گشت مامورهیل دهولهتی خهله سلاح کهن وه له جی ناوبریاێ دیورهو کهفن وه تفهنگهیل مامورهیل نیرو ئێنتزامی رژیم وهگهرد خۆیان بهن . دیواێ ئهو ئێتفاقه ، نیروهیل ئێنتزامی رژیم له ناو شار کامیاران دهس وه ئهزیهت و ئازار مهردم دایون وه ئهو جوره که له ناو خهوهرهیل له ئهو باره هاتیود ، حال و رۆژ شار کامیاران وه تنی ئهمنیهتی وه فهزاێ نێزامی وه ئهو شاره حاکم بی یه . ئهزیهت و ئازار مهردم کورد له خوهرههڵات کوردستان وهلاێ نیروهیل ئێنتزامی و ئهمنیهتی رژیم ئاخۆندی ئێرانهو دێرێ وه جیێک کیشێ که مهردم بێ ئهوه که کهسێک وه ئهوان بیوشێ دهس وه مقاومهت دهن وه دی حازر نی ین له ئهوه فرهتر بێ ئێحترامی و ئهزیهت و ئازار خۆیان وهلاێ نیروهیل نێزامی رژیمهو قهبوول بکهن . وه بێ گۆمان ئهگهر ئهو وهزه دریژه پیا بکهێ ، نیروهیل ئێنتزامی رژیم بایه چاورێ دهرگیریهیل فرهتر مهردم کورد وهگهرد خۆیان بون .
وه نیروهیل ئهمنیهتی یهمهنییش بائس کۆشیان 50 کهس له ئێنسانهیل مۆعتهرز ئهو ولاته بین :
دۆکتورهیل یهمهنی وهتنه ، له ئهنجام تیرهنازی کردن نیروهیل ئهمنیهتی له شار سهنعا پایتهخت ولات یهمهن وهرهو لاێ مهردم ، دهس کهم 50 کهس کۆشیاس و سهدهیل کهس تر وه تنی زهخمی بینه ...درێژهی وتار
برزیل ئیوشێ : رژیم ئاخۆندی ئێران ، سۆلح خوازانه بی ین بهرنامهێ ئهتۆمی خۆێ نیشان بهێ :
وهزیر ئۆمور دهرهوهێ برزیل وهتیاس : ئێ نگرانی یه ههس که بهرنامهێ ئهتۆمی ئێران وه تهور کامل سۆلح خوازانه نهود وه کار وهدهسهیل رژیم ئاخۆندی ئێران بایه ئێ مشکلهیله حهل بکهن ...درێژهی وتار
ئهگهر ئێ دهولهته پاکترینه ، پهس دهولهت ناپاک هاکو ؟
یه له قسیهیل محهمهد رهزا خهباز ، ئهندام کۆمیسیون ئێقتسادی مهجلێس رژیمه ...درێژهی وتار
خهوهرهیل رهسیاێ له کوردستان نیشان له دریژهێ تن بی ین فهزاێ ئهمنیهتی و نێزامی حاکم وه ئاوائیهیل دهورووهر شار کامیاران دێرێ :
له ناو خهوهرهیلێک که له شار کامیاران وه دهس ئیمه رهسیاس هاتیه ، مامورهیل ئهمنیهتی رژیم وهگهرد رشیان وه ناو ئاوایی گازرخانی سهر وه شار کامیاران ، وه وشکانن مالهیل مهردم له ناو ئهو ئاوایی یه دهس دانه . بێجله یانه مامورهیل ئهمنیهتی رژیم دهس وه پرس و جور کردن و سۆئال پرسین له شمارێک له مهردم ئهو ئاوایی یه دایون وه لێوا تواسیون له ناو مهردم وه ئهوهیش فرهتر جهوانهیل ترس و وهحشهت درس بکهن . قابل باسه ئهو کار مامورهیل رژیمه چهن ساتێک دریژه داشتیه . ههر لێوا رۆژ یهێشهمه 27 نۆخشان مانگ ، مامورهیل ئهمنیهتی رژیم له پاسگاێ قازانچی له مهسیر جادهێ کامیاران ئهراێ کرماشان ، دهس وه وشکانن گشت مسافرهیل دایون که ئهو کار مامورهیل رژیمه بائس نگرانی و ئێعتراز مسافرهیل بیود . قابل باسه وشکانن و پرس و جور کردن له مهردم له ناو ئهو پاسگا تا چهن رۆژ دریژه داشتیه . له ناو خهوهر تر هاتیود : له حال و رۆژ جهواد سابری ، منال ئاوایی تیله کو که 10 رۆژ لێیهوهر وهلاێ نیروهیل ئهمنیهتی رژیمهو دهسگیر بیود خهوهرێک له دهس نی یه وه ئێ بێ خهوهری یه بائس فره تر بی ین نگرانی خانوادهێ کهس ناوبریاێ بی یه .
حهمله وه مالهیل مهردم له جی یهیل جوراوجور کوردستان :
رشیان مامورهیل ئێنتزامی رژیم وه ناو مال مهردم له فرێک له شار و ئاوائیهیل کوردستان وه پهلپ کووهو کردن ئانتنهیل ماهوارهیی هێما دریژه دێرێ . دهسدریژی مامورهیل ئێنتزامی رژیم وه ناو مال مهردم کورد له مهنتهقهیل جوراوجور شار سنه جور مهێدان گاز ، حاجی ئاوا وه مهحهلهێ فهرهجه وه ههر لێوا جی یهیل جوراوجور شار کامیاران وه تهور وهرولاو دریژه دێرێ . له ناو خهوهرێک له ئهو رابته ، نیرو ئێنتزامی رژیم له کوردستان وه بێ شهرمی یهو وهتیون : تا ئێگه فرهتر له 11 هزار ئانتن وه دهم و دهسگایل ماهواره له جی یهیل جوراوجور کوردستان کووهو کردنه وه دهس وه خراو کردن ئهوانه دانه . داشتن ماهواره یهکێک له حهقهیل ئهوهلیهێ ههر ئێنسانێکه که له ناو ئێ دنیا زنهی کهێ . حهقێک که کار وهدسهیل رژیم ئاخۆندی له ئێران وه گرتن ئهوه له مهردم ئێفتخار کهن . دهسگاێک که مهردم وه فرهتر ئهوهیش مهردم ئێران وه ئهو ولاتهیله که ئینترنت قهوی نهێرن وه یا ئهگهر دێرن فیلتر بود وه وهسیلهێ ئهوه تیوهنن بفامن له دنیا چه خهوهره وه چه ئێتفاقێک دێرێ ئهراێ ئهوان وه دهورووهریان کهفێ . ههر وهێ خاترهسه که کار وهدهسهیل رژیم تا نهفهس ئاخر جنگیهن که مهردم ئێران وه ئهوهیش فرهتر مهردم فهقیر له داشتن ئهوه بێ نسیو بکهن . چیون فکر کهن ئهگهر مهردم له ماهواره ئێستفاده بکهن ، له چشتهیلێک باخهوهر بون که زانسنێ ئهراێ ئهوان گران تهمام بود . بێ گۆمان کار وهدهسهیل رژیم جارێک وه ئێ نهتیجه نهرهسینه که له دنیاێ ئێمرو مهردم ئهگهر ماهوارهیش نیاشتون ، ئهقهوره وهسیلهیل ئێرتبات کۆمهلایهتی فرهوه بی یه که زیو ئاگا دار خهوهرهیل رۆژ دنیا بون وه بێ گۆمان کار وهدهسهیل بێ سهواد و بێ مهنتق رژیم وه ئێ ئهسل سادهیش فکر نیهکهن که ههرچگه ئهوان له سهر مهسئهلێک سهختگیری فرهترێک بکهن ، جسارهت مهردم ئهراێ ئهنجام دان ئهو کاره فرهترهو کهن ، وه له یانه گشتێ مۆهمتر یهکه کار وهدهسهیل رژیم بایه قهبوول بکهن که دی دێرن قۆدرهت خۆیان له دهس دهن وه دی خنیهێ ئهوان ئهراێ مهردم رهنگێ نهێرێ وه ئهگهر توان له یهکه ههس رسواتر نهون وه حهقهیل رهواێ مهردم ئێحترام بنهن .
وه خهوهرهیل له شار سنه له دهسگیری 3 ئهندام ئهنجۆمهن سێنفی مۆئهلمهیل کوردستان نیشان دێرێ :
له دریژهێ دهسگیری و زندانی کردن چالاکهیل سیاسی و ئهدهبی کوردستان ، رۆژ دوشهمه 28 نۆخشان مانگ 3 کهس له ئهندامهیل ئهنجۆمهن سێنفی مۆئهلمهیل کوردستان له شار سنه دهسگیر وه ئهراێ زندان کل کریایون . له ناو ئهو رۆژه 3 کهس له ئهندامهیل سێنفی مۆئهلمهیل کوردستان وه ناوهیل پهیمان نهویدیان ، رامین زهندنیا وه بهها مهلکی که ئهراێ دادگا ئێسلامی شار سنه بانگ کریایون ، وهخت چیینیان ئهراێ دادگا دهسگیر وه ئهراێ زندان کڵ کریایون . ئهوه چشتێک نزیک 3 دهههس که چالاکهیل کورد له خوهرههلات کوردستان بهردهوام وه دهس نیروهیل ئهمنیهتی رژیم ئاخۆندی دهسگیر وه ئهراێ زندان کڵ کریهن ، ئێتهامێک که وه فرێک له ئهو چالاکهیله دریهێ ، دژمنی کردن وهگهرد خۆدا و نێزام ولایهت فهقی وه هاوکاری کردن وهگهرد حێزبهیل کوردی مۆخالێف رژیمه وه کهم نی ین چالاکهیلێك که وه خاتر ئهو ئێتهامهیله وه حال حازر له زندان وه سهر بهن . وه له ناو خهوهر تر له شار سنه هاتیود : دهسگا قهزایی رژیم له ئهو شاره مۆختار زارعی ، چالاک مهدهنی وه زندان مهحکوم کردنه . وه بان حۆکم دهرکریاێ ، مۆختار زارعی ، خهلک شار سنه وهلاێ شۆعبهێ 104 دادگاێ گشتێ یی ئهو شارهو وه ئێتهام قسیه گهن کردن وه دادخواز شۆعبهێ پهنجم دادسهرا له وهخت ئهنجام دان وهزیفهێ وه 6 مانگ زندان مهحکوم بی یه . قابل باسه مۆختار زارعی پارهکهیش قهێرێک له بازداشت وه سهر بردیود که له ئاخرهو وهگهرد قهرار وهسیقه ئازاد بیود .
کۆڵبهر فهقیر تر وه ههر لێوا کاسبکارێک وه دهس نیروهیل ئێنتزامی رژیم له کوردستان کۆشیان :
رۆژ شهمه 26 نۆخشان مانگ ، مامورهیل نیرو ئێنتزامی رژیم له سهردهشت ، یهێ کۆلبهر زامهت کیش و فهقیر تر وه ناو شیرزاد ئهمانی ئهو وهر گۆله دان که وه داخهوه ئهو کۆڵبهره گیانێ له دهس دا . شیرزاد ئهمانی منال ئاوایی هۆرمۆز ئاوا که 24 سال سن داشتیود وه ئهیویش جور کۆڵبهرهیل تر ئهو دیاره ، ئهراێ وه دهس هاوردن بژی رۆژانهێ خۆێ و خانواداگهی دهس وه ئهو کار پڕ خهتهره دایود وه داخهوه له ناو ههفتهێ لێیهوهر بیو وه تیر پڕ له کینهێ نیروهیل نائێنسان رژیم ئاخۆندی یهو له کوردستان . وه ههر لێوا رۆژ یهێشهمه 27 نۆخشان مانگ مامورهیل نیرو ئێنتزامی رژیم دوواره له شار سهردهشت ، دهس وه تیرهنازی وهرهو لاێ ماشین یهێ کاسبکار وه ناو ئاوات یوسفی دایون که وه داخهوه کهس ناوبریاگیش گیانێ له دهس دایود . ئاوات یوسفی خهلک ئاوایی دهرمان ئاوا وه خاون ئات و ئیال بیود وه وهگهرد ماشین شهخسی خۆێ له مهسیر ناوێن ئاوائیهیل مرغان و گهولان له حهرهکهت بیود که وه داخهوه مامورهیل نیرو ئێنتزامی ماشینهکهێ ئهیو ئهو وهر گۆله دهن وه بائس کۆشیان ئهیو بون . کهس ناوبریاێ له وهختێک ئهو وهر گۆلهێ مامورهیل ئێنتزامی رژیم کهفتیود که هیچ جوره بار قاچاخێک له ناو ماشینهکهێ پیا نهیود ، یانێ بارێک نیاشتیود که پیا بود . کۆڵبهری شۆغل کازبێکه که مهردم نهوار مهرزی کوردستان وه خاتر دهستهنگی و بێکاری و نهداری ، وهرهولاێ ئهوه کیشییهن ، ئێنسانهیلێک که رێگهو چارهێ فرێک ئهراێ وه دهس هاوردن بژی رۆژانهێ خۆیان نهێرن وه له سهر ناچاری دهس وه ئهو کار پڕ خهتهره دهن . تهقه کردن و کوشتن کوڵبهرهیل کورد وه دهس نیروهیل ئێنتزامی رژیم له وهختێک ئێتفاق کهفێ که تا ئێگه کار وه دهسهیل رژیم له کوردستان هیچ بهرنامهێ خاسێک ئهراێ خاس کردن حال و رۆژ ئێقتسادی مهردم ئهرایه نهیانه وه سۆئال مهردم کورد که ئهوان ئهراێ پیا کردن بژی رۆژانهێ خۆیان بایه چوه بکهن ، بێ جواو مهنیاس . کۆشیان ههر رۆژی کوڵبهرهیل فهقیر کورد له وهختێکه که له ناو شار و جی یهیل تر ولات ئێران رۆژێک سهدهیل تۆن بار قاچاخ وارد بود بێ ئهوه که خوین له لیوت کهسێک برشێ .
له ناو ههفتێك كه ئهو پشت سهر نایمن ، جایزهێ هڵمهن ههمێت وه کاوه قاسمی کرماشانی دریا :
کاوه قاسمی کرماشانی وه 4 رۆژنامه نویس تر ئێرانی هاورێ وهگهرد 44 کهس تر له هۆنهرمهندهیل ، رۆژنامه نویسهیل وه مۆدافهیل حۆقوق بهشهر له سهرانسهر دنیا ، بین وه بهوهر جایزهێ حۆقوق بهشهر هڵمهن ههمێت سال 2011 میلادی . کاوهێ قاسمی کرماشانی ، رۆژنامه نویس و چالاک حۆقوق بهشهر کورد کرماشانی که له ناو زمسان مانگ 1389 له لاێ دهسگا قهزایی حۆکومهت ئاخۆندی ئێرانهو له شار کرماشان وه جۆرم کار کردن وه زد ئهمنیهت مێلی وه 4 سال زندان مهحکوم بیود ، له لاێ سازمان دیدهبان حۆقوق بهشهر ناوملهتهیلهو، ئهراێ گرتن ئهو جایزه ههڵوژیا . کاوهێ کرماشانی وهگهرد بههمهن ئهحمهد ئهمویی ، ئهمیر رهشیدی ، چالاک سیاسی وه کهسێک تر له ناو ئێران له ناو لیست سازمان دیدهبان حۆقوق بهشهر وه چهو تیهن که جایزه وه ئهوان دریهێ . کهس چوارم که له ناو ئێران زنهی کهێ وه خاتر مهسئهلهیل ئهمنیهتی وه ترس و لهرز له ئاخر و ئاقبهتهیل قهزایی له سازمان حۆقوق بهشهر تواسیود که ناو ئهیو ئاشکرا نکهن . جایزهێ هڵمهن ههمێت ، ههر ساله له لاێ سازمان دیدهبان حۆقوق بهشهر ناوملهتهیلهو وه چالاکهیل و کهسهیل دهفا کهر له حۆقوق ئێنسانهیل که وه خاتر ئێنتقاد له کار وهدهسهیل حۆکومهتی وه یا له چاپ دان و ولاو کردن راپۆرتهیلێک که ئهکس نهزهر و خاست حۆکومهتهیله وه له لاێ کار وهدهسهیل حۆکومهتی یهو ئهزیهت و ئازار دریهن وه گیان ئهوان هاڵه خهتهر دریهێ که ئێ جاره ههر ئهو جوره که وه خزمهتدان ئهرز بی کاوهێ قاسمی کرماشانی ، چالاک حۆقوق بهشهر کورد کرماشانی یهکێک له کهسهیلێکه که ئهراێ گرتن ئهو جایزه ههڵوژیایه .
له دریژهێ دهسگیریهیل مهردم مۆعتهرز کورد ئیلامی و کرماشانی 2 وبلاگ نویس تر کرماشانی دهسگیر وه ئهراێ زندان کڵ کریان :
له ناو راپۆرتێک که له ئهو باره ولاوهو بیود هاتیود : 2 وبلاگ نویس خهلک شار کرماشان وه ئێتهام نویسان و ولاو کردن خهوهرهیل وه زهرهر نێزام ئاخۆندی وهلاێ پۆلیس ئهو رژیمهو دهسگیر وه ئهراێ زندان کڵ کریانه . سایت خهوهر رهسنی پۆلیس رژیم وهگهرد وه راس زانسن ئهو خهوهر نویسایود : ئهو 2 وبلاگ نویسه وه خاتر شکایهت و دادخوازی شاکی وه دیواێ کڵ کریان پهروهندهێ ئهوان له ئاگاهی ئێنتزامی ئۆستان کرماشان ئهراێ پۆلیس فهزاێ تهولید و داین و گرتن ئێتلاعات ، ناسیاێ وه فهتا دهسگیر وه ئهراێ زندان کڵ کریانه . خهوهر دهسگیری ئێ 2 وبلاگ نویس کرماشانی یه له وهختێک ولاوهو بی یه که له ناو ههفتهیل لێیهوهر 10 تا 12 جهوان تر له شارهیل گهیلان ئهیوان وه ئیلام دهسگیر وه ئهراێ زندان کڵ کریایون که تا ئێگه شمارێک له ئهوان ههر له زندان وه سهر بهن وه کار وهدهسهیل دهولهتی هیچ خهوهرێک له بارهێ ئازادی ئهوان ئهو دهیشت نیانه . فرێک له کارناسهیل سیاسی کورد ئیوشن : کار وهدهسهیل رژیم ئێ کارهیله تهنیا وه خاتر درس کردن فهزاێ ترس و وهحشهت له ناو مهردم کورد له شارهیل کوردنشین ئهنجام دهن وه توان وهێ جوره وه مهردم نیشان بهن که ئهوان له ههر چشتێک خهوهر دارن تا مهردم له ئهوان رخیان بچود وه له ئهوان حساو بهوهن . وه ئهراێ دریژه دان ئێ نهخشه و سیاسهت شوم خۆیانهو ، جهوانهیل کورد بێ ئهنجام دان هیچ جۆرمێک دهسگیر وه ئهراێ زندان کڵ کهن .
بهیانیهێ ئێعترازی سازمان دهفا له حۆقوق بهشهر کوردستان :
له دریژهێ حهملهیل سپا پاسدارهیل رژیم ئاخۆندی له ئێران وه نوار مهرزی کوردستان ، سازمان دهفا له حۆقوق بهشهر کوردستان وهگهرد ئێنتقاد له دریژهێ فهزاێ نێزامی و ئهمنیهتی له کوردستان ، خوازیار وه ئاخر هاتن جهو رخ بردن و وهحشهت درس کردن له ناو کوردستان بیود . سازمان دهفا له حۆقوق بهشهر کوردستان وهگهرد له چاپ دان بیانیێک نویسایود : بهردهوامی نورسن ئهمنیهتی وه جواوهیل تنوتێژ وه خاستهیل ئێنسانی و قانونی مهردم کورد له رۆژههلات کوردستان ، فهزاێک وهگهرد ئێحساس ئهمنیهت نهکردن گیانی وه رهوانی له ناو زهن و فکر مهردم له ئێ مهنتهقه درس کردیاس . تن تر بی ین فهزاێ پادگانی و نێزامی له فرێک له شارهیل کوردنشین وه ئهوهیش فرهتر شار سنه که پاسگایل نێزامی و جی یهیل ئیست و بازرهسی له ناو مهێدانهیل و جی یهیل عۆمومی شار هانه وهر چهو ، بائس بی یه تا ئێحساس نائهمنی و ترس ، سیماێک له یهێ پادگان نێزامی گهورا له ناو ئهو شاره وه نمایش بنهێ . ئهلبهت له ناو ئێ 30 و چهن ساله که له عۆمر رژیم ئاخۆندی ئهو پشت سهر نایمنه ، ههمیشه کار وهدهسهیل رژیم وه چهو یهێ مۆخالف و دۆژمن وه مێلهت کورد نورسنه ، وه ههمیشه مهردم کورد له بیوچک ترین حهقهیل خۆیان مهحروم بینه وه مهردم کورد وه خاتر بیوچک ترین چالاکی سیاسی و فهرههنگی و ئهدهبی و کۆمهلایهتی خۆیان جۆرمهیل گهوراێگ جور هاوکاری وهگهرد زد ئێنقلاب و ولاتهیل بێگانه وه ئهوان نێسبهت دریاس وه له ئێ رێیه تاوانهیل فرێک دانه وه فره جار بائس بی یه که سهر جهوانهیل کورد بێ هیچ گۆناێک ئهوبان دار بچود ، ئهوان تیرواران بکریهن وه یا زندانی بون که ههر ئێگهیشه کهم نی ین کهسهیلێک که له زندانهیل رژیم وه سهر بهن . نهوهتیاێ دیاره که وریایی مێلهت کورد وه ئاگایی و داشتن زانیاری له بارهێ حهقوحۆقوق خۆیان وه درس موزه گرتن له نواێ سیاسهتهیل رژیم ئاخۆندی چه له کوردستان وه چه له ناو ولات ئێران وه چه له دهرهوهێ ئێران بائس بی یه که کار وهدهسهیل نێزام ئاخۆندی ئێران ههمیشه وه دید ئهمنیهتی یهو وه کوردستان بنورن .
ئهحمهدی نژاد ئهراێ جارێک تر له کار و بار ناوهکی سوریه دخالهت کرد وه پیشنیار کرد ولاتهیل ئێسلامی له ئۆمور ناوهکی سوریه دخالهت بکهن :
دیواێ سهر هێزدان مهوج ئێعترازهیل مهردمی له ولاتهیل ئافریقاێ شۆمالی وه خاوهرناوراس که له دنیا وه ناو وههار عهرهوی ناسیاسه ، وه بائس بی که تاج و تهخت فرێک له دیکتاتورهیل له یهک بشێویهێ ، کار وهدهسهیل رژیم دیکتاتور ئاخۆندی له ئێران ههمیشه موزهیل جوراوجورێک له نواێ ئهو ئێعترازهیل وه حهق مهردمه گرتنه ...درێژهی وتار
